ඇමෙරිකා එක්සත් ජනපදයේ හත්වැනි නාවික බලඇණියේ යූ.එස්.එස් බ්ලූ රිජ් නෞකාව බ්‍රහස්පතින්දා (31) දිවයිනෙන් පිටත්ව යන බව ශ්‍රී ලංකාවේ ඇමෙරිකා තානාපති කාර්යාලය පවසයි.
කොළඹ ඇමෙරිකා තානාපති කාර්යාලයේ මැදිහත් වීමෙන් මෙරට මාධ්‍යවේදීන් පිරිසක් ද බ්ලූ රිජ් නෞකාව නැරඹීමේ චාරිකාවකද නිරතවූහ. මෙහිදී මාධ්‍යවේදීන්ට පැයකට ආසන්න කාලයක් නෞකාවේ පිහිටි ප‍්‍රධාන නාවික මෙහෙයුම් මැදිරිය ,නෞකාවේ ආරක්ෂිත මෙහෙයුම් කුටිය , හෙලිකොප්ටර් අංගනය, පුස්තකාලය හා රැස්වීම් ශාලාව ඇතුළු නෞකාවේ ස්ථාන කිහිපයක් නැරඹීමටද අවස්ථාව හිමිවිය.
නැව දින පහක් පුරා කොළඹ වරායේ නැංගුරම්ලා තිබිණි.
ඇමෙරිකාවේ වොෂිටන් නුවරදී ඉකුත් දෙරටේ බලධාරීන් අතර පැවති සහයෝගීතා ප‍්‍රයත්නයන් ශක්තිමත් කිරීම , මුහුදු කොල්ලකෑම් පාලනය ,මානුෂීය ආධාර වැඩසටහන් සඳහා සහාය දීම සහ කලාපයේ අත්‍යවශ්‍ය නැව් මාර්ග තුළ සංචලනයේ නිදහස් බව සහ ආරක්ෂක බව තහවුරු කිරීමට මෙම නෞකාව පැමිණි අතර නෞකාව කොළඹ වරායේ නැංගූරම්ලා පැවති දින කිහිපයේදී ජනාධිපති මෛත‍්‍රිපාල සිරිසේන මහතා ,කථානායක කරු ජයසූරිය ,විදේශ කටයුතු අමාත්‍ය මංගල සමරවීර යන මහත්වරුද මෙම නෞකාව නිරීක්ෂණ කිරීමේ සංචාරයක නිරතවූහ.
2011 වසරේ ඔක්තෝබරයෙන් පසුව එනම් වසර පහකට පසුව මෙරටට පැමිණි පළමු එක්සත් ජනපද නෞකාව වන බ්ලූ රිජ් නෞකාව සමඟ පැමිණි 900කට අධික නැවියන් මෙරට රැඳී සිටි දින කිහිපයේදී ස්වේච්ඡාවෙන් මෙරට ප‍්‍රජා මධ්‍යස්ථානයක බිත්ති සහ ගෘහ භාණ්ඩ අලුත්වැඩියාව, ක‍්‍රීඩා පිටි ගොඩනැඟීම සහ අසරණ පිරිස් සඳහා ආහාර වේල් ලබාදීම ඇතුළු විවධ සමාජ සුබසාධන කටයුතු වල නිරත වූයේය. මීට අමතරව මොවුන් ශ්‍රී ලංකා නාවික හමුදාවේ නිලධාරීන් සමඟ සාකච්ඡා පැවැත්වීමටද කටයුතු කළේය.
(ජායාරූප - තිළිණි ද සිල්වා)
