මහින්ද රාජපක්‍ෂ මහතා ලැබූ මැතිවරණ පරාජයන්හි වගකීම භාරගෙන විදේශගතව සිටි බැසිල් රාජපක්‍ෂ මහතා දැන් නැවත පැමිණ පක්‍ෂයට තුන්වැනි පරාජයත් ලබාදෙන්නට උත්සාහ කරමින් සිටින බව වාරිමාර්ග අමාත්‍ය විජිත් විජිතමුණි සොයිසා මහතා අද (23) පැවසීය.
ශ්‍රී ලංකා නිදහස් පක්‍ෂයට රාජ්‍ය බලය ලබාගැනීමටනම් පළමුව කළ යුත්තේ බිම් මට්ටමේ බලය ලබාගැනීම සඳහා ඉදිරි පළාත් පාලන මැතිවරණය ජයගැනීම බව කී අමාත්‍යවරයා ඒ වෙනුවෙන් පක්‍ෂයේ සිටලූ දෙනා ඒකරාශී විය යුතු බව ද සඳහන් කළේය.
පළාත් පාලන මැතිවරණයට අපේක්‍ෂකයින් තෝරාගැනීමේ සම්මුඛ පරීක්‍ෂණ ලබන මාසයේදී ආරම්භ කිරීමට පක්‍ෂය පියවර ගෙන තිබෙන බව ද අමාත්‍යවරයා කීවේය.
‘ශ්‍රී ලංකා නිදහස් පක්‍ෂයේ වත්මන් සභාපති මෙන්ම රටේ ජනාධිපතිවරයා වන මෛත‍්‍රීපාල සිරිසේන මහතාගේ නායකත්වයෙන් පක්‍ෂයේ සියලූ දෙනා ඒකරාශී කරගෙන ඉදිරි පළාත් පාලන මැතිවරණයට තරග කිරීමට බලාපොරොත්තු වෙනවා. සම්මුඛ පරීක්‍ෂණ ජූලි 12 වැනිදා සිට ආරම්භවීමට නියමිතයි. පක්‍ෂයේ බිම් මට්ටම ශක්තිමත් කර ජයග‍්‍රාහී මැතිවරණ ව්‍යාපාරයකට පක්‍ෂය මෙහෙයවීම අපේ අරමුණයි.‘ යැයි ද ඔහු කීය.
