මහාවංශය නැතිනම් ඉන්දියාවට ඉතිහාසයක් නැතැයි අගමැති රනිල් වික්‍රමසිංහ මහතා අද (14) මහචාර්ය චන්ද්‍ර වික්‍රමගමගේගේ මහාවංශ නව සංස්කරණය එළිදැක්වීමේ උත්සවයට එක්වෙමින් පැවසීය.

අරලියගහ මන්දිරයේ පැවැති උත්සවයේදී අදහස් දැක්වූ අගමැතිවරයා කියා සිටියේ ලංකාවේ අභීත ඉතිහාසයක් තිබෙන බවයි.

‘මහානාම ස්වාමීන්වහන්සේටත් මුගලන් ස්වාමීන් වහන්සේටත් ස්තූතිවන්ත වෙනවා. මහාවංශය ලංකාවේ ඉතිහාසය විතරක් නෙමෙයි. ථේරවාදයයි ඉන්දියාවේ ඉතිහාසයයි ලියැවුණේ මහාවංසය නිසා. ජෝර්ජ් ටර්නල් ඒජන්තවරයා කළ පරිවර්තනය නිසා ධර්මාශෝක රජු කවුරුන්දැයි හඳුනාගැනීමට පුළුවන් වුණා‘ යැයි ද කී අගමැතිවරයා සිය උපදෙස් පරිදි මහාවංශයේ ඉංග්‍රීසි පරිවර්තනයක් සඳහා කමිටුවක් ද පත් කළේය.