වත්මන් රජය බලයට පත්වී අවුරුද්කුත් මාස හතකට පසු පසුගිය රජයේ වැරදි ගැන ප‍්‍රශ්න කිරීමට මාධ්‍යවේදීන්ට හෝ පුරවැසියන්ටවත් අයිතියක් නැතැයි ඒකාබද්ධ විපක්‍ෂයේ ජාතික සංවිධායක, පාර්ලිමේන්තු මන්ත‍්‍රී ඩලස් අලහප්පෙරුම මහතා පැවසීය.
ඔහු මේ බව පැවසුවේ බොරැල්ල එන්.එම් පෙරේරා මධ්‍යස්ථානයේදී මාධ්‍ය හමුවකදීය.
ඒකාබද්ධ විපක්‍ෂය බදාදා (27) මහනුවරින් ආරම්භ කරන්නට යන පා ගමන සම්බන්ධයෙන් මෙම මාධ්‍ය හමුව පැවති ඊට එයට ආණ්ඩුවෙන් ද බාධා ඇතැයි ඔහු කීවේය.
ප‍්‍රශ්නය
එදා විපක්‍ෂයේ විරෝධතාවලට බාධා ඇතිනොකළ බව, ක‍්‍රීඩාංගන වෙන් නොකළ බවද කියන්නේ?
පිළිතුර
එහෙම වුණා යැයි හිතමු. ඒත් ඒකම කරන්න මේ ආණ්ඩුවට අයිතියක් තිබෙනවාද? එහෙම වී නැති බව මම නැවත නැවතත් සහතික වෙනවා. මේ ආණ්ඩුව බලයට පත්වී අවුරුද්දකුත් මාස හතකට පස්සේ මාධ්‍යවේදියෙකුට තියා පුරවැසියෙකුටවත් ඔහොම ප‍්‍රශ්න කරන්න අයිතියක් නැහැ. මම ඒ ප‍්‍රශ්නය ගැන කනගාටු වෙනවා. අද එදා ආණ්ඩුවත් ඒක කළා නේද අහනවා නම් ඔබ නියෝජනය කරන්නේ ආණ්ඩුවේ පාර්ශවයයි. ඔබ මැදයි ඉන්න ඕනෑ.
ප‍්‍රශ්නය
අද වෙන්නේත් එදා දේම නේද කියා ඇසීම වරදක්ද?
පිළිතුර
ඔබ උදව් කරන්න එපා. ආණ්ඩුව වෙනුවෙන් පෙනී ඉන්නත් එපා. මාධ්‍ය නිදහස, ලිච්ඡවී ප‍්‍රතිපත්ති ගැන කතා කරන ආණ්ඩුවක් දැන් ගෝත‍්‍රික හා අශීලාචාර උපක‍්‍රම යොදාගන්නවා නම් එය විවේචනය කර අපට ඇඟිල්ල දික්කරන්න.
ප‍්‍රශ්නය
එදා ආණ්ඩු කාලයේත් බලයට එන්නට පෙර විවිධ පොරොන්දු දුන්නා. ඒත් ඊට පටහැනි දේ වුණා. දැන් ඒ ගැන ඇසීම වරදක් වෙන්නේ කොහොමද?
පිළිතුර
අපෙන් වූ අතපසුවීම් ගැන අපි පුන පුනා කියා තිබෙනවා. ඒ දේ වලට ජනතාව අපිට තීන්දුවක් දුන්නා. දැන් ජනතාව මේ ආණ්ඩුවට බලය දුන්නේ හීනෙන්වත් වැරදි නොකරන්නයි.
ඒකාබද්ධ විපක්‍ෂයේ නායක දිනේෂ් ගුණවර්ධන,ලංකා සම සමාජ පක්‍ෂයේ නායක මහාචාර්ය තිස්ස විතාරණ, ප‍්‍රජාතන්ත‍්‍රවාදී වාමාංශික පෙරමුණේ නායක වාසුදේව නානායක්කාර, පාර්ලිමේන්තු මන්ත‍්‍රීවරුන් වන කෙහෙලිය රඹුක්වැල්ල, මහින්දානන්ද අලූත්ගමගේ, සී.බී රත්නායක, රොෂාන් රණසිංහ, නාමල් රාජපක්‍ෂ, රංජිත් සොයිසා යන මහත්වරුන් ඇතුළු පිරිසක් මෙම මාධ්‍ය හමුවට සහභාගී වූහ.
