ශ්‍රී ලංකාවේ සිදුවු බව කියන යුද අපරාධ සම්බන්ධයෙන් පමණක් නොව අනෙක් සෑම කටයුත්තක් සම්බන්ධයෙන්ම පරීක්ෂණ පැවැත්වීමේ දී මෙරට සිදුවන කවර අන්දමක හෝ යාන්ත්‍රණයකට දෙමළ ජාතික සන්ධානය අකැමති බවත්, සලකා බැලීමක් හෝ කරන්නේ ජාත්‍යන්තර විනිසුරුවන්ගෙන් යුතු යාන්ත්‍රණයක් ඇත්නම් පමණක් බවත් උතුරු පළාත් ප්‍රධාන අමාත්‍ය සී.වී.විග්නේස්වරන් පැවසීය.
මෑතදී රටවල් හයක තානාපතිවරුන් හා යුරෝපා සංගමයේ නියෝජිතයයින් අවස්ථා කීපයක්ම වරින්වර පැමිණ සාකච්ඡා කළේ කවර කරුණුදැයි යාපනයේ මාධ්‍යවේදීන් මහ ඇමැතිගෙන් ඇසීය.
තමන් එසේ පැවසුවේ දැනට රටේ පවතින වාතාවරණය අනුව අධිකරණය සම්බන්ධයෙන් පමණක් නොව සෑම තැනකම සාධාරණය ඉටු නොවන වටපිටාවක් ගොඩනැගී අති අයුරු දක්නට ලැබීම නිසා යැයි ඔහු කියා සිටියේය.
පක්ෂයක් වශයෙන් දෙමළ ජාතික සන්ධානය රජයෙන් ඉල්ලා සිටි කිසිම ඉල්ලීමක් හෝ මෙතෙක් ඉටුවී නොමැති බව පවසන ඔහු දකුණේ ඊනියා ජාතිවාදී පක්ෂවල අදහස් හා විරෝධතා මත යැපෙමින් රටේ දෙමළ වැසියන්ගේ ප්‍රශ්නවලට විසඳුම් සෙවිය නොහැකි බවද පැවසීය.
ශ්‍රී ලංකාවේ දෙමළ වැසියන්ගේ ප්‍රශ්නයට එකම විසඳුම උතුරු නැගෙනහිර පළාත් එකට එකතු කොට පෙඩරල් පාලන ක්‍රමයක් ලබාදීම පමණක් යැයි තමන් උතුරට පැමිණි සියලුම විදේශීය නියෝජිතයින්ට පැවසූ බව කී මහ ඇමැතිවරයා මෙම අදහසෙන් ඉවත් වීමට දෙමළ ජාතික සන්ධානයට මෙන්ම දෙමළ ජනයාටද අවශ්‍යතාවයක් නැතැයිද කීවේය.
