‘යුක්ලිඩ්’ අඳුරු පදාර්ථ සොයන්න යයි


තාරකා විද්‍යාඥයන් විසින් හඳුනා ගනු ලැබූ විශ්වයේ ඇති අඳුරු ශක්තිය සහ අඳුරු පදාර්ථ ගවේෂණය කිරීමේ අරමුණින්, යුරෝපා අභ්‍යවකාශ ආයතනය නිපදවූ දුරේක්ෂය අභ්‍යවකාශයට යැවීම සාර්ථකව සිදුවිය.

දුරේක්ෂය හැඳින්වෙන්නේ ‘යුක්ලිඩ්’ Euclid යනුවෙනි. ඒ, පුරාණ ග්‍රීක ගණිතඥයා සිහි ගන්වමිනි. දුරේක්ෂය අභ්‍යවකාශ ගත කෙරුණේ ඇමෙරිකා නාසා ආයතනයේ සහාය ඇතිවය.

යුරෝපා විද්‍යාඥයන් නිර්මාණය කළ මෙම දුරේක්ෂය උඩු ගුවනට රැගෙන ගියේ නාසා ආයතනය හා සම්බන්ධ ‘ෆෝල්කන් 9’ රොකට්ටුවය. ඒ, කැනරවල් තුඩුවේ පිහිටි අභ්‍යවකාශ මධ්‍යස්ථානයේ සිටය. දුරේක්ෂය නිපදවීමට ඇමෙරිකන් බිලියන 1.4 ක් වැය වූ බව පැවැසෙයි. දුරේක්ෂය නිපදවීමට ගත වුණු කාලය අවුරුදු 6 කි.

තාරකා විද්‍යාඥයන්ට අනුව, අප මෙතෙක් වටහා ගත් විශ්වයේ සියයට 95 ක් ඇත්තේ අඳුරු ශක්තිය සහ අඳුරු පදාර්ථ ය.

සාර්ථකව අභ්‍යවකාශයට යැවුණු ‘යුක්ලිඩ්’ දුරේක්ෂය රැඳවීම සිදුවන්නේ පෘථිවිය සහ හිරු අතරේ ගුර්ත්වාකර්ෂණය බලය අතින් ස්ථාවර ස්ථානයකය. 

‘එල් 2 ලක්ෂ්‍යය’  යනු මෙම ස්ථානයයි. (2nd Lagrage Point ලෙස තාරකා විද්‍යාඥයන් මෙය හඳුන්වයි.) පෘථිවියෙන් ඔබ්බෙන් 2nd Lagrage Point පිහිටයි.

අභ්‍යවකාශ දුරේක්ෂ රැඳවීම සිදුවන්නේ මෙම ස්ථානයේය. සුප්‍රසිද්ධ  ජේම්ස් වෙබ් අභ්‍යවකාශ දුරේක්ෂය ද මෙහි රඳවා ඇත. 2nd Lagrage Point, පෘථිවියේ සිට සැතපුම් මිලියනයක් (කිලෝ මීටර් මිලියන 1.6 ක්) දුරින් පිහිට බව ද පැවැසෙයි.

ලුසිත ජයමාන්න
ස්තුතිය - නාසා ආයතනයට