උද්ගත වී ඇති අයහපත් කාලගුණ තත්ත්වය හමුවේ අවදානම් සහිත නිවාස සහ ප්‍රදේශවලින් ඉවත්ව හැකි ඉක්මනින් ආරක්ෂිත ස්ථාන කරා ගොස් රජයේ ආපදා කළමනාකරණ වැඩසටහනට උපරිම සහාය දෙන්නැයි ජනතාවගෙන් ඉල්ලා සිටින බව අගමැති රනිල් වික්‍රමසිංහ මහතා අද (19) අරලියගහ මන්දිරයේ පැවැති විශේෂ ප්‍රවෘත්ති සාකච්ඡාවකදී පැවසීය.
‘ආපදා කළමනාකරණ අමාත්‍යවරයාත් නීතිය හා සමාය අමාත්‍යවරයාත් මමත් හානියට පත්වූ ප්‍රදේශවල ගුවනින් ගොස් නිරීක්ෂණයක් කළා. අප එය නිරීක්ෂණය කළේ ඇතිවී තිබෙන තත්ත්වය පිළිබඳව වටහා ගැනීමටයි. 1975 වසරේ සිට මා මේ ප්‍රදේශවල ගංවතුර දැක තිබෙනවා. විපතට පත්වූවන්ට සහන සැලසීමට සහභාගිවී තිබෙනවා. මෙවර ගංවතුරේදී වෙනත් අවස්ථාවලට වඩා විශාල ප්‍රදේශයක් ගංවතුරට යටවී තිබෙන ආකාරය දැකගන්නට හැකි වුණා. ඉදිරි කාලගුණ තත්ත්වය පිළිබඳව සෑහීමකට පත්විය නොහැකියි. වර්ෂාව නතර වේ යැයි බොහෝ අය බලාපොරොත්තු වුණා. නමුත් මාලදිවයිනේ සිට වැහි වලාකුළු ශ්‍රී ලංකාව කරා පැමිණීමට පටන්ගෙන ඇති බව කාලගුණ විද්‍යා දෙපාර්තමේන්තුව දැනුම්දී තිබෙනවා. සිකුරාදා (20) සිට ආපදාවට ලක්වූ ප්‍රදේශවල ආරක්ෂාව ශක්තිමත් කිරීමට අප පියවර ගන්නවා. ප්‍රදේශවල සහන සේවා කටයුතු සිදු කරනවා මෙන්ම ආරක්ෂාව තහවුරු කර ප්‍රදේශවාසීන්ගේ දේපළ සුරක්ෂිත කිරීමට රජය කටයුතු කරනවා.‘ යැයි ද අගමැතිවරයා ප්‍රකාශ කළේය.
ඡායාරූප හා වීඩියෝ - ගයාන් අමරසේකර
