පාර්ලිමේන්තුවේ සංයුතිය වෙනස් නොකර කුමන්ත‍්‍රණකාරී ලෙස ආණ්ඩුවක් හැදීමට කිසිවෙකුට නොහැකි බවත් අද වත්මන් ආණ්ඩුව ශක්තිමත් ගමනක් යමින් සිටින බවත් ජනාධිපති මෛත්‍රිපාල සිරිසේන මහතා පැවසීය.
මාධ්‍ය ආයතන ප‍්‍රධානීන්, පුවත්පත් කතුවරුන් සහ විද්‍යුත් මාධ්‍ය අධ්‍යක්ෂවරුන් සමග ජනාධිපති මන්දිරයේ පැවති හමුවකට එක් වෙමින් ජනපති මේ බව කීවේය.
‘අද තිබෙන්නේ ශී‍්‍ර ලංකා නිදහස් පක්ෂයේ අර්බුදයක් නොව පක්ෂය තුළ සිට පක්ෂය පරාජය කළ දූෂිත කල්ලියක් සහ පක්ෂයේ ප‍්‍රතිපත්ති සහ දර්ශනය ආරක්ෂා කරමින් පිරිසිදු දේශපාලනයක් තුළ පක්ෂය ඉදිරියට ගෙන යාමට කටයුතු කරන පිරිසක් අතර මතු වු තත්ත්වයක්. පවුලේ කිහිප දෙනෙක් එක්වී උදෑසන තේ මේසයේදී ගත් තීන්දු තීරණ එදා මේ රටේ අනාගතය තීන්දු කෙරෙන තීරණ බවට පත්වුණා. එදා ඇමැති මණ්ඩලය සහ ආණ්ඩු පක්ෂය බල රහිත ඇමති මණ්ඩලයක් සහ ආණ්ඩු පක්ෂයක් බවට පත්ව තිබුණා‘ යැයි ද කී ජනපති පැවති රජයේ කි‍්‍රයාකාරීත්වය අද ඇතැමුන්ට අමතක වී යන අයුරු පෙනෙන්නට තිබෙන අතර එවන් දරදඩු, දූෂිත පාලනයක් නැවත මේ රටේ ඇති කිරීම වෙනුවෙන් ඇතැම් මාධ්‍ය ආයතන ද පෙනී සිටීම කණගාටුවට කරුණක් බව කියා සිටියේය.
එක්සත් ජාතික පක්ෂයට එරෙහිව වසර 48 ක් හඬ නැගූ තමා ආණ්ඩුවෙන් එළියට බැස්සේ, රටේ ජනතාව වෙනුවෙන් ද්‍රෝහී ගමනක් යන්නට තීන්දු කළ පාලනයක් නවතා දමා ජනතාවගේ ප‍්‍රජාතන්ත‍්‍රවාදය සහ නිදහස ආරක්ෂා කිරීමට බවද මෙහිදී ජනපති ප්‍රකාශ කළේය.
