‘විජේ සඳුදා (08) උදේ කිරිබත් ඉල්ලුවා. මම කිරිබත් හදලා දුන්නා. පස්සේ මම බාත් රූම් එකේ ඉන්න විට පපුව දැවිල්ලයි දැවිල්ලයි කියා කෑගහනවා ඇහුනා. මම විගහට එයා ළඟට ආවා. පසුව පුතා ඇවිත් උගුරට ගහන ස්ප්‍රේ එක දුන්නා. ටික වේලාවක් යන විට මගේ අත උඩට මුහුණ ඇලවුණා. මම විජේ විජේ කියලා කතා කළා. ඇස් ඇර මා දිහා බැලුවා. ඒ සමගම පපුවේ ශබ්දයක් ආවා.‘ යැයි ප්‍රවීණ රංගන ශිල්පී විජය නන්දසිරිගේ මරණ පරීක්ෂණයේ සාක්කි දෙමින් ඔහුගේ බිරිය දේවිකා මිහිරානි පෙරේරා (60) මහත්මිය පැවසුවාය.
දකුණු කොළඹ මහා රෝහලේ හදිසි මරණ පරීක්ෂක විපුල නරසිංහ මහතා ඉදිරියේ සාක්කි දුන් ඇය මෙසේ ද කීවාය.
‘අපට දරුවන් දෙදෙනකු සිටිනවා. අවුරුදු 25ක පමණ සිට මගේ සැමියාට දියවැඩියාව තිබුණා. අවුරුදු නවයක දහයක සිට වම් කකුළේ තුවාලයක් තිබුණා. ඔහුට 2000 වසරේ දී බයිපාස් සැත්කමක් කළා.
සඳුදා(08) උදේ සිදුවීමත් සමග මගේ නංගිලා අපේ නිවසට ආවා. ගිලන් රථයක් ගෙන්වා ගෙන කලුබෝවිල රෝහලට ගෙන ආවා. මම පුතා සමග මෝටර් රථයෙන් රෝහලට ආවා. බාහිර රෝගී අංශයේ වෛද්‍යවරුන් පරීක්ෂාකර බලා සැමියා මිය ගිය බව මට පැවසුවා. මරණය සම්බන්ධයෙන් මට සැකයක් නෑ. ‘
විජය නන්දසිරිගේ බාල සොයුරා වන සරත් නිර්මල ප්‍රේමලාල් (61) මහතා සාක්කි දෙමින් මෙසේ කීවේය.
‘මිය ගොස් ඇත්තේ මගේ අයියා. මට තවත් මල්ලි කෙනෙක් ඉන්නවා. අයියාට දියවැඩියාව ඇති බව දැන ගත්තේ මීට වසර දහයකට පමණ පෙරයි. වසර හතරකට පෙර අයියාගේ රෝගී තත්ත්වය ගැන හොඳට දන්නවා. සඳුදා (08) 12ට පමණ අයියා අසනීප වී රෝහල් ගත කළ බවත්, පසුව මිය ගිය බවත් නංගීගෙන් දැන ගත්තා.
දකුණු කොළඹ මහා රෝහලේ අධිකරණ වෛද්‍ය නිලධාරී එච් කේ ආර් සංජීව මහතා පශ්චාත් මරණ පරීක්ෂණය පැවැත්වීය.
ඉදිරිපත් වූ සාක්කි සැලකිල්ලට ගත් විපුල නරසිංහ මහා විජය නන්දසිරිගේ මරණය හෘද්ද රෝගය නිසා සිදුවූ ස්වභාවික මරණයක් බවට තීන්දු කළේය.
