2013 උසස් පෙළ ප්‍රතිඵල මත 2016 වසරේ විද්‍යාපීඨ 19කට සිසුන් බඳවා ගැනීමේදි රටේ ඉහළම අධ්‍යාපන සුදුසුකම් ලබපු ඉහළම ඉසෙඩ් අගයන් ලබපු දරුවන් විශාල ප්‍රමාණයකට අසාධාරණයක් සිදුව ඇති බවත් මේ අසාධාරණය පිළිබඳව දිගින් දිගටම අධ්‍යාපන බලධාරීන්ට අභියාචනා කළ නමුත් කිසිදු සධාරණයක් සිදුව නැති බවත් ලංකා ගුරුසේවා සංගමයේ සභාපති මහින්ද ජයසිංහ පැවසීය.
2013 වසරේ උසස් පෙළ විභාගයෙන් ඉහළ සාමාර්ථ ලබා ගත් සිසුන් මෙවර ජාතික අධ්‍යාපන පීඨ වලට බඳවා ගැනීමේදි ඉහළ සුදුසුකම් ලැබු සිසුන්ට විද්‍යාපීඨ අහිමි වීමට එරෙහිව එම සිසුන් හා දෙමාපියන් අද (27) අධ්‍යාපන අමාත්‍යංශය ඉදිරිපිට උද්ඝෝෂණයකට එක්වූ අවස්ථාවේ ඔහු ඒ බව කීවේය.
‘අපිට බරපතල සැකයක් තියනවා මේ විද්‍යාපීඨ බඳවා ගැනීම් ඇතුලේ බරපතල ලෙස දේශපාලන මැදිහත් වීම් තියනවද කියලා. ඒ වගේම යම් මුදල් ගනුදෙනු තියනවද කියලා. මොකද සමහර තැන් වල ප්‍රකාශ කරලා තියනවා බඳවා ගන්න නම් ගිහිල්ලා ඇමැති මුණගැහෙන්න කියලා.මේ නිසා අපිට බරපතල සැකයක් තියනවා ඉතිහාසයේ කවදාවත් නැති විදියට යහපාලන ආණ්ඩුවෙන් විද්‍යාපීඨ වලට බඳවා ගැනීමත් දේශපාලනිකරණය කළාද කියලා‘ යැයි ද ඔහු කීවේය.
