රට ගිහින් බැටකන ගුටි කන ජනතාවට රටේ ජිවත් වෙන්න ආර්ථිකයක් හදන්න ආණ්ඩුව අසමත් වී යැයි ජවිපෙ මන්ත්‍රී ‘එතෙර අපි‘ සංවිධානයේ සභාපති සුනිල් හඳුන්නෙත්ති මහතා අද (15) පැලවත්ත ජනතා විමුක්ති පෙරමුණේ මුලස්ථානයේ පැවති මාධ්‍ය හමුවකදී පැවසීය.
‘පසුගියදා ඇතිවූ ගංවතුර ගැලීමෙන් පසු විපතට පත් ජනතාවට සහන සැලසීම වෙනුවෙන් විදේශගත ශ‍්‍රී ලාංකිකයින් විශාල පිරිසක් පුද්ගලිකවත් එතෙර අපි සංවිධානය සමගත් එකතුවී කටයුතු කළා. ඔවුන් විශාල වශයෙන් ආධාර උපකාර කළා. එම සියලූ දෙනාටම එතෙර අපි සංවිධානය ලෙස අපි ස්තූතිවන්ත වෙනවා. ඔවුන් විදේශගත වෙලා සිටියත් තමන්ගේ රටේ සහෝදර ජනතාව වෙනුවෙන් යුතුකම් ඉටු කළා‘ යැයි ද හඳුන්නෙත්ති මහතා කීය.
‘විදේශ ගත ශ‍්‍රී ලාංකිකයින් තමන්ගේ විවිධ ගැටලූ සඳහා මැදිහත් වෙන්න කියලා ආණ්ඩුවෙන් ඉල්ලා තිබියදී ඒවාට මැදිහත් නොවී නොඉල්ලූ රක්ෂණ ක‍්‍රමයක් දීලා තියෙනවා. කටාර් එක්සත් අරාබි එමීර් රාජ්‍යය යන රටවල් වලටද මෙම රක්ෂණ ක‍්‍රමය හදුන්වා දී තිබෙනවා. ඒ නිසා ආණ්ඩුව පැහැදිළි කළ යුතුයි මේ රක්ෂණ ක‍්‍රමය කවුරුන් වෙනුවෙන්ද ඊට තිබෙන පදනම මොකක්ද කියලා‘ යැයි ද ඔහු එහිදී සඳහන් කළේය.
