අධික වැසි සහ නායයෑම් හේතුවෙන් විපතට පත්වූවන්ට සහන සැලසීම සඳහා රුපියල් කෝටි 15ක මුදලක් වෙන් කිරීමට කැබිනට් මණ්ඩලය තීරණය කළ බව පාර්ලිමේන්තු කටයුතු හා ජනමාධ්‍ය අමාත්‍ය ගයන්ත කරුණාතිලක මහතා පැවසීය.
ස්වභාවික ආපදා සඳහා වූ ජාතික රක්‍ෂණාවරණ වැඩසටහන යටතේද රුපියල් කෝටි 2ක මුදලක් ජාතික ආපදා සහන සේවා මධ්‍යස්ථානයට ලබා දී ඇතැයි ද අමාත්‍යවරයා සඳහන් කළේ රජයේ ප‍්‍රවෘත්ති දෙපාර්තමේන්තුවේදී අද (18) පැවති කැබිනට් තීරණ දැනුම් දීමේ මාධ්‍ය හමුව අමතමිනි.
ක්‍ෂණික ආපදා සහන සේවා සැපයීමේදී රක්‍ෂණ ක‍්‍රමය යටතේ දැනට ආවරණය නොවන කාරණා සම්බන්ධයෙන් සහන සැලසීමට අතිරේක ප‍්‍රතිපාදන වෙන්කරවා ගැනීමට අමාත්‍ය අනුර යාපා මහතා ඉදිරිපත් කළ යෝජනාවක්ද කැබිනට් මණ්ඩලය විසින් අනුමත කළ බව ඇමති ගයන්ත කරුණාතිලක මහතා සඳහන් කළේය.
මේ අතර වැස්සෙන් හා ගංවතුරෙන් පීඩාවට පත්වූවනට සහන සැලසීම සඳහා අවශ්‍ය කටයුතු සම්පාදනය කළ යුතු බැවින් රාජ්‍ය සේවකයන්ගේ නිවාඩු අවලංගු කර ඇති බව ස්වදේශ අමාත්‍ය වජිර අබේවර්ධන පවසයි.
ජනපති හා අගමැති උපදෙස් පරිදි සහන සේවා කටයුතු සිදුකිරීමට රජය පියවර ගෙන ඇති බවද ඇමැතිවරයා කීය.
සහන කටයුතුවලදී ස්වදේශ අමාත්‍යංශයෙන් නිසි පරිදි සේවා ඉටු නොවන්නේ නම් 1905 අංකයට දැනුම් දෙන ලෙසද අමාත්‍යවරයා කියයි.
