‘පක්ෂ බේදය අවසන් කරලා ජනපති හා අගමැති මේ ගමන යන්න තීරණය කිරීම ඵෙතිහාසික අවස්ථාවක්. කවුරු උඩුබිරුලුවත් තමන්ගේ අවස්ථා අහිමිවූ වෘක්කයින් වියරුවී කෑගැහුවත් ඒ වෘකයින්ට දඩයම් හොයාදෙන සිඟාලයෝ මොන ආකාරයට හූ හඬ තැබුවත් මේ අපේ ගමන යනවා‘ යැයි මහ නගර හා බස්නාහිර සංවර්ධන අමාත්‍ය පාඨලී චම්පික රණවක මහතා අද (4) බණ්ඩාරගමදී පැවසීය.
‘අපිට මතකයි එදා මේ රටට අලුත් යුගයක් ගොඩනගා ගැනීමට වෘත්තීය මට්ටමේ මිනිසුන්ගේ රටක් ගොඩනගා ගැනීමට අපි කැපවුණා. අපිට ජනවරමක් ලැබුණා. ඒක සමහරුන්ට ඔරොත්තුදෙන්නේ නෑ. ‘ යැයිද ඇමැතිවරයා කීය.
බණ්ඩාරගම තෙමහල් පොදු වෙළඳ සංකීර්ණයේ පළමු අදියර ආරම්භ කිරීමේ අවස්ථාවට එක්වෙමින් රණවක මහතා එසේ කීවේය. නියෝජ්‍ය ඇමැති අජිත් පී.පෙරේරා මහතාද එම අවස්ථාව එක්විය.
