‘අපේ ඉතිහාසය සැමවිටම කියා ඇත්තේ රාජ්‍ය පාලනය, රටේ පැවැත්ම, රටේ අනාගතය පිළිබඳව, රජ කළ මහ රජුන්ගේ සිට පාලකයින්ටත්, ජනතාවටත් මගපෙන්වුයේ ගෞරවනීය මහා සංඝරත්නය බවයි. අපේ ගෞරවනීය භික්ෂුන් වහන්සේලා ඉතිහාසය පුරා අපේ ශ්‍රේෂ්ඨ මාතෘ භූමිය වෙනුවෙන් ථේරවාදි බුදුදහම ප‍්‍රචලිත කිරීමට පමණක් නොව අපේ මාතෘ භූමියට එල්ල වු ආක‍්‍රමණ වලදී රට අභ්‍යන්තරයෙහි ඇති වු විවිධ අරගල වලදී අපේ රටේ ඒකීයභාවයට, ස්වාධීනත්වයට, මාතෘ භූමියේ ගෞරවය ආරක්ෂා කරගනිමින් අඛණ්ඩ දේශයක් ලෙස පවත්වාගෙන යාමට යහපත් මානව සමාජයක් ගොඩනගන්නට භික්ෂුන් වහන්සේලා දුන් මගපෙන්වීම සහ ශක්තිය අගය කළ යුතුයි‘ යැයි ජනපති මෛත්‍රිපාල සිරිසේන මහතා අස්ගරි මහනායක හිමියන්ට අක්තපත්‍ර ප්‍රදානය කිරීමේ උත්සවයට මහනුවරදී එක්වෙමින් පැවසීය.
ඉතිහාසය තුළ අපිට කියාදුන් මගපෙන්වීම් තුළ අද දවස මෙන්ම හෙට දවස වෙනුවෙන් මේ රට ගොඩනගන්නට, යහපත් කරන්නට, සමාජය සුවපත් කරන්නට නව මහ නායක හා අනුනායක හිමියන්ගේ පදවි ප‍්‍රාප්තිය මුළු මහත් ලෝකවාසි බෞද්ධ ජනතාවට මහා ආශිර්වාදයක් බවද පැවසූ ජනපති වාණිජ ලෝකයේ නව තාක්ෂණයත් සමග ඇතිවන පිරිහීම්, පසුබෑම් මේ සියල්ල සඳහා ශක්තිමත් මගපෙන්වීම වන්නේ ථේරවාදී බුදුදහම තුළින් ඇතිවන අධ්‍යාත්මික ගුණවගාව බව පෙන්වා දුන්නේය.
වරකාගොඩ ශ්‍රී ඥානරතන ශ්‍යාමෝපාලි වංශික මහ නිකායේ අස්ගිරි විහාර පාර්ශවයේ අභිනව මහ නායක සහ අනුනායක ආණමඩුවේ ශ්‍රී ධම්මදස්සි හිමිවරුන් දෙනමට සන්නස් පත්‍ර පිළිගැන්වීමේ රාජ්‍ය මහෝත්සවය ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් දළඳා මාලිගා පරිශ්‍රයේ ඓතිහාසික මගුල් මඩුවේදී පැවැත්විණි.
අගමැති රනිල් වික්‍රමසිංහ මහතා ඇතුළු සම්භාවනීය අමුත්තෝ රැසක් ද උත්සවයට එක්ව සිටියහ.
