‘1978 ව්‍යවස්ථාව මඟින් නිර්මාණය කරන විධායක ජනපතිධුරය නිසා අනාගතයේ දිනෙක ආඥාදායකයකු බිහිවන බව එදා පාර්ලිමේන්තු විවාදයට එක්වෙමින් සිරිමාවෝ මැතිනිය කීවා. මම ඊයේත් ඒ හැන්සාඩ් වාර්තා කියෙව්වා. ඊට එරෙහිව වීදි බැස සටන් කිරීමට සිදුවනු ඇති බව එදා සිරිමාවෝ මැතිනිය කී අනාවැකිය මට ප‍්‍රායෝගිකව කි‍්‍රයාවට නංවන්න සිදුවුණා‘ යැයි ජනාධිපති මෛතී‍්‍රපාල සිරිසේන මහතා අද (7)පැවැසීය.
ලොව ප‍්‍රථම අගමැතිනි සිරිමාවෝ බණ්ඩාරනායක මහත්මියගේ ජන්ම ශත සංවත්වරය නිමිත්තෙන් කොළඹ බණ්ඩාරනායක ජාත්‍යන්තර අනුස්මරණ සම්මන්ත‍්‍රණ ශාලාවේදී අද පැවැති උත්සවයේදී ජනාධිපතිවරයා මේ කරුණු කීවේය.
‘රටක් විදියට ගත්තාම, බණ්ඩාරනායක මැතිනියගේ තිබුණු විශිෂ්ට ගුණාංග, කාන්තාවක් ලෙසත් ඇයට තිබූ නායකත්ව, පෞරුෂත්ව ලක්ෂණ ඉතා විශිෂ්ටයි. අද නායකයන්ට ඇය ආදර්ශයක්. ඇය වංචාව දූෂණය පිටු දැක්කා. කිසිවකුටත් ඇයට චෝදනා එල්ල කරන්න බැහැ. අද අපේ රටට එවැනි නායකයන් අවශ්‍යයි. රටක නායකයන් බලය, බලය භාවිත කිරීම, ප‍්‍රබුද්ධ මානව සමාජයක් ගොඩනැගීම කෙරෙහි ඉතා හොඳ අධ්‍යයනයක් කළ යුතුයි‘ යැයි ද ජනාධිපති සඳහන් කළේය.
