හිටපු ජනපතිවරයාට බැටෑලියන් තියාගෙන රට වටේ ගොස් ආණ්ඩු පෙරළීමට ඉඩදිය නොහැකි යැයි වාරිමාර්ග ඇමැති විජිත් විජයමුණී සොයිසා මහතා පැවසීය.
හමුදා ආරක්ෂාව ඉවත් කිරීම සම්බන්ධයෙන් මාධ්‍යවේදියකු ඇසූ පැනයකට පිළිතුරු දෙමින් පළාත් සභා හා පළාත් පාලන අමාත්‍යංශයේ අද (2) දහවල් පැවැති මාධ්‍ය හමුවකදී ඔහු එසේ කීවේය.
‘මිලිටරි මානසිකත්වයක් තිබෙන අය මිලිටරි තියෙනවාට කැමතියි. අන්තවාදී හා පැසිස්ට්වාදී ක්‍රමවලට එයා කැමතියි. මේක යහපාලනය ප්‍රජාතන්ත්‍රවාදය මානව හිමිකම් සහ ජාතික සංහිඳියාව ඇති කරන ආණ්ඩුවක් හැටියට වෙනස් ක්‍රමවේදවලට අපි කාටවත් ඉඩ තියන්නේ නෑ. ආරක්ෂාව සැලසිය යුත්තේ පොලිසිය මගිනුයි‘ යැයිද ඔහු කීය.
