(ගයාන් සූරියආරච්චි)
ආරගම්බේ සිද්ධිය සම්බන්ධයෙන් විවිධ කටකතාවලට රැවටී රට අර්බුදකාරී තත්ත්වයකට පත් නොකරන ලෙස මහජන ආරක්ෂක අමාත්‍ය විජිත හේරත් මහතා පැවැසීය.
මෙම තත්ත්වය උපයෝගී කරගෙන බියවැද්දීම් දේශපාලන වාසි ලබාගැනීම් සිදුනොකරන ලෙස සමහර දේශපාලනඥයන්ට අවධාරණය කර බවත් වගකිව යුතු රජයක් ලෙස සෑම ආරක්ෂක පියවරක්ම මේවන විට අරගෙන ඇති බවද අමාත්‍යවරයා කීය.
ඔහු ඒ බව පැවැසූවේ අද (24) මහජන ආරක්ෂක අමාත්‍යාංශයේ පැවැති මාධ්‍ය හමුවකට එක්වෙමිනි.
ජනාධිපතිවරණයට පෙර සිට මෙම අනතුරු ඇගවීම සිදුකර තිබූ අතර එය ඉන්දීය බුද්ධි අංශ මගින් අනාවරණය කළ අනතුරු ඇගවීමක් නොවන බවත් ලොවපුරා රටවල සිටින ඊශ්‍රායල ජාතිකයන් සම්බන්ධයෙන් පවතින තත්ත්වයක් බවත් අමාත්‍යවරයා කීය.
එහිදී අදහස් දැක්වූ විජිත හේරත් මහතා වැඩිදුරටත් කියා සිටියේ මේවන විට රජයක් වශයෙන් විදේශ සංචාරකයන් සම්බන්ධයෙන් ගතයුතු සෑම ආරක්ෂක පියවරක්ම ඉතා පැහැදිලිව සහ ශක්තිමත්ව අරගෙන ඇති බවත් එබැවින් කිසිදු බියක් චකිතයකින් තොරව සංචාරකයන්ට ලංකාවේ සංචාරය කළ හැකි බවද අමාත්‍යවරයා කීය.
කිසිදු බියකින් තොරව හෝටල් සහ සංචාරක ක්ෂේත්‍ර පවත්වාගෙන යන ලෙසත් ඒ ඒ හෝටල්වලට ආරක්ෂක විධික්‍රම පවත්වාගෙන යන ලෙස දැනුම්දී ඇති බවත් විජිත හේරත් මහතා කීය.
පොතුවිල් සහ ආරුගම්බේ ප්‍රදේශයේදී මේවන විට සැකපිට පුද්ගලයන් තිදෙනෙකු අත්අඩංගුවට ගෙන ඇති බවත් ඔවුන් විදේශික ජාතිකයන් නොවන බවත් මහජන ආරක්ෂක අමාත්‍ය විජිත හේරත් මහතා පැවසීය.
අත්අඩංගුවට සැකකරුවන් සම්බන්ධයෙන් තවමත් විමර්ශන සිදුකරමින් පවතින අතර මෙම තර්ජනාත්මක බලපෑම මීට මාසයකට පමණ පෙර සිට විදෙස් බුද්ධි අංශ මගින් ලැබී තිබූ බවත් ඒ සම්බන්ධයෙන් එම තොරතුරු ලැබුණු දා පටන් එම ප්‍රදේශවල පොලිස් ආරක්ෂාව වැඩි කළ බවත් විජිත හේරත් මහතා පැවසීය.
ජාතියක් වශයෙන් අපේ රටේ ජනතාව ඉලක්ක කරගෙන කැළැඹීමක් ඇති කරන බවට බුද්ධි අංශ වාර්තා තොරතුරු අනාවරණය කර නොමැති බවත් ඒ සම්බන්ධයෙන් අනවශ්‍ය බියක් ඇති කර නොගත යුතු බවත් අමාත්‍යවරයා කීය.
මෙවන විට ඊශ්‍රායල ජාතිකයන් 575 දෙනකු මෙරට රැදී සිටින බවත් ඊශ්‍රායලයෙන් කළ නිවේදනයෙන් පසු ඊශ්‍රායල ජාතිකයන් පිරිසක් මෙරටින් පිටව ගොස් ඇති බවත් හේරත් මහතා පැවැසීය.
(ඡායා සුමුදු හේවාපතිරණ)
