ඉන්දියාව සහ ශ්‍රී ලංකාව අතර පාලමක් තැනීමේ කිසිඳු සැලසුමක් නැතැයි උසස් අධ්‍යාපන හා මහාමාර්ග අමාත්‍ය ලක්‍ෂ්මන් කිරිඇල්ල මහතා පැවසීය.
ඒකාබද්ධ විපක්‍ෂයේ පිරිස සෑම දිනකම උදෑසන එල්ලෙන්නට දෙයක් සොයමින් සිටින බව කී අමාත්‍යවරයා හනුමාගේ වලිගයේ හෝ එල්ලී බලයට ඒමට ඔවුන් උත්සාහ කරමින් සිටින බව ද සඳහන් කළේය.
අමාත්‍ය ලක්‍ෂ්මන් කිරිඇල්ල මහතා මේ බව පැවසුවේ ප‍්‍රමුඛතා මාර්ග ව්‍යාපෘතිය තුන්වැනි අදියර යටතේ ආරම්භ කෙරෙන සබරගමුව පළාතේ මාර්ග සංවර්ධනය කිරීමේ ව්‍යාපෘතියේ ආරම්භක අවස්ථාවට එක්වෙමිනි.
රඹුක්කන මාවනැල්ල මාර්ගයේ සංවර්ධන කටයුතු මෙහිදී ආරම්භ කෙරුණු අතර එම උත්සවය රන්දිවෙල මංසන්ධියේදී පැවැත්විණි.
“ඒකාබද්ධ කල්ලියේ අය එක කාලයක් බැඳුම්කරයේ එල්ලූණා. වැට් එකේ එල්ලූණා. විදේශ විනිශ්චයකාරවරු ලංකාවට ගේනවා කියලා ඒකේ එල්ලූණා. දැන් පාලමේ එල්ලිලා ඉන්නේ. අන්තිමට හනුමාගේ වලිගයේ එල්ලිලා ඉන්නේ. ඔය පාලම හදන්න කිසිම උවමනාවක් නැහැ. මේ රටේ හදන්න කොච්චර පාලම් තියෙනවද? ඒ හදන පාලම් සේරම නවත්වලා ඔය පාලම හදන්නද කියන්නේ.“ යනුවෙන් අමාත්‍යවරයා ප්‍රශ්න කළේය.
