රුහුණු කතරගම දේවාලයේ බස්නායක නිළමේ ඩී.පී කුමාරගේ මහතා කතරගම දේවාල භූමියට ආසන්නයේ තිබු බෙහෙත් වත්ත නමින් හඳුන්වන භූමියක් ඉන්දියාවේ තිරුපති දේවාලයට ලබා දීමට එලි පෙහෙළි කළැයි කතරගම (15) විරෝධයක් පැවැත්විණි.
කතරගම නාගහ වීදිය ආසන්නයේ ඇති මෙම ඉඩම බස්නායක නිළමේ වරයා මිට සතියකට පෙර ඩෝසර් කළේය.
මෙම ඉඩම භෞතික සැලසුම් දෙපාර්තෙමින්තුවට අයත් ඉඩමකි.
ඉන්දියාවේ තිරුපති දේවාලයට අනුබද්ධ දේවාලයක් ඉදිකිරීමේ අරමුණින් අක්කර 30 ක් පමණ වන මෙම බිම යොදා ගන්නට යතියි කියති.
කතරගම නගරයේ ජනතාවද නාගහවීදිය, ගමිණීපුර, ගෝතමීගම ජනතාව විරෝධතා පූවරු රැගෙන පූජා භූමියට පැමිණ දේවාලයටද ගොස් පොල්ගසා බස්නායක නිළමේ කාර්යාලයට ගොස් එහි බළධාරියෙකු මුණගැසී මෙම වන විනාශය නතර කරන ලෙස ඉල්ලා සිටියහ. ඔවූහු කතරගම නගරයේ බස්නැවතුම්පොළට ද ගොස් ගොස් සිය විරෝධතා පූවරුද රැුගෙන මාර්ගයේ වාඩිවී විරෝධතාවයක නිරත වූහ.
කතරගම කිරිවෙහෙර විහාරාධිපති රුහුණු මාගම්පත්තුවේ ප‍්‍රධාන සංඝනායක කොබවක ධමිමින්ද හිමි, කපුගම සරණතිස්ස හිමි, දෙටගමුව ජයසුමනාරාමධිධිපති නවිමණ නාලක හිමි, කතරගම මල්ලිකාරාමාධිපති මාඳුගොඩ ඤාණමෝලි, වල්ලිමාතාගම වල්ලිකන්දාරාමවිහාරධිපති ලත්පඳුරේ විපුල භද්‍ර හිමි හා කතරගම පක්‍ෂ විපක්‍ෂ දේශපාලනඥයෝ ද එක්ව සිටියහ.
කතරගම බස්නායක නිළමේ ඩී.පී. කුමාරගේ මහතා පැවසූයේ මෙම කාරණයට සම්බන්ධ ඉඩම් කොටසේ ලඳු කොටස පොල් පැළ සහ සඳුන් පැළ සිටුවීම පිණිස එළි පෙහෙළි කළ බවයි. මෙම ස්ථානයේ කිසිඳු දේවාලයකට, පුද්ගලයෙකුට හෝ ආයතනයකට බාර දීමට ක්‍රියා කර නොමැති බවත් යම් හෙයකින් මෙම ස්ථානය දේවාලයක් සෑදීම සඳහා ලබා දීමට සැළසුමක් අනුමත කර ඇත්නම් හෝ ලියවිල්ලක් වෙත්නම් ඔප්පුකර පෙන්වන ලෙසත් එසේ ඔප්පු කළහොත් බස්නායක නිළමේ තනතුරෙන් ඉවත් වන බවත් ඔහු කීවේය.
(ඡායාරූප - කේ.ඩී. දේවප්‍රිය)
