සුජිත් හේවාජුලිගේ
පක්ෂවල තීරණයට පිටින් විමධ්‍යගත අරමුදල් සහ මත්පැන් බලපත්‍ර ලබාගත් විපක්ෂයේ මන්ත්‍රීවරුන්ට එරෙහිව දැඩි විනය ක්‍රියාමාර්ග ගැනීමට විපක්ෂයේ දේශපාලන පක්ෂ නායකයන් තීරණය කර ඇත. බොහෝ මන්ත්‍රීවරුන් විමධ්‍යගත අරමුදල් සහ මත්පැන් බලපත්‍ර ලබාගෙන ඇතැයි පැවසෙන්නේ තමන් අයත් දේශපාලන පක්ෂවල නායකයන් දැනුම්වත් නොකර බව පැවසේ.
මේ සම්බන්ධයෙන් අදහස් දැක්වූ ශ්‍රී ලංකා මුස්ලිම් කොංග්‍රසයේ නායක රවුෆ් හකීම් මහතා පැවසුවේ එසේ විමධ්‍යගත මුදල් ලබාගත් තම පක්ෂයේ මන්ත්‍රීවරු කිහිප දෙනෙකුගේ නම්ද සඳහන් වූ බවයි.
පක්ෂ නායකත්වය දැනුම්වත් නොකර මෙවැනි දේවල් සිදු වී ඇති බවත්, මේ තත්ත්වය යටතේ ඒ මන්ත්‍රීවරුන්ට විනය පරීක්ෂණවලට මුහුණ දීමට සිදුවිය හැකි බවත් ඔහු පෙන්වා දුන්නේය.
මේ සම්බන්ධයෙන් අදහස් දැක්වූ විපක්ෂයේ ප්‍රධාන සංවිධායක මහනුවර දිස්ත්‍රික් පාර්ලිමේන්තු මන්ත්‍රී නීතිඥ ලක්ෂ්මන් කිරිඇල්ල මහතා පැවසුවේ විමධ්‍යගත මුදල් හෝ මත්පැන් බලපත්‍ර හෝ තීරු බදු රහිත වාහන බලපත්‍ර හෝ ලබා ගැනීමට සමගි ජන බලවේගය පක්ෂයක් හැටියට කිසිදු තීරණයක් මෙතෙක් ගෙන නැති බවයි.
පක්ෂයේ තීරණයට පිටින් ආණ්ඩුවෙන් එවැනි වරප්‍රසාද ලබා ගත් මන්ත්‍රීවරුන්ට එරෙහිව දැඩි විනය පියවර ගත යුතු බව ද ඔහු සඳහන් කළේය. සමගි ජන බලවේගයේ පාර්ලිමේන්තු මන්ත්‍රීවරුන් දස දෙනෙකු ආණ්ඩුවෙන් විමධ්‍යගත අරමුදල් ලබාගෙන ඇතැයි එම පක්ෂ ආරංචි මාර්ගවලින් පැවසේ.
ආණ්ඩුව ජනාධිපතිවරණයේදී සහාය ලබා ගැනීම සඳහා විපක්ෂයේ මන්ත්‍රීවරුන් පිරිසකට පමණක් විමධ්‍යගත අරමුදල් ලබාදී ඇති බවත්, මෙය ඉතා වැරදි ක්‍රියාවක් බවත් සඳහන් කරමින් විපක්ෂයේ මන්ත්‍රීවරුන් පිරිසක් ඒ ගැන ජනාධිපතිවරයාට ද පැමිණිලි කර ඇත. විමධ්‍යගත අරමුදල් සියලු‍ම මන්ත්‍රීවරුන්ට එක සමානව ලබාදෙන්නැයි ද ඔවුන් එහිදී වැඩිදුරටත් ඉල්ලා ඇත.
