(මනෝප්‍රිය ගුණසේකර)
රුපියල් කෝටි 1500 කට අධික පාඩුවක් සිදු වූ බවට සැලකෙන බැඳුම්කර වංචාව සම්බන්ධයෙන් මහා බැංකුවේ හිටපු අධිපතිවරයා ඇතුළු පුද්ගලයින් දස දෙනෙකුට පමණ අපරාධ අධිකරණයක් හමුවේ චෝදනා ඉදිරිපත් කිරීමට හැකියාවක් ඇතැයි වාර්තා වේ. 
බැඳුම්කර කොමිසම හමුවේ මේ වන විට ඉදිරිපත් වී ඇති සාක්කි විශ්ලේෂණය කිරීමේදී කොමිසමේදී ඇඟිල්ල දිගුවෙන පුද්ගලයින්ට එරෙහිව මෙලෙස චෝදනා ඉදිරිපත් කිරීමට හැකියාවක් ඇතැයි ඔව්හු පෙන්වාදෙති.
මහා බැංකුවේ හිටපු අධිපතිවරයාට, මෙම වංචනික කටයුත්ත සඳහා ඔහුට සහාය පළ කළ මහා බැංකුවේ නිලධාරීන් පිරිසකට, වංචනික අන්දමට ලංසු ඉදිරිපත් කළ සේවක අර්ථ සාධක අරමුදලේ ජාතික ඉතිරිකිරීමේ බැංකුව ඇතුළු මූල්‍ය ආයතනවල නිලධාරි පිරිසක් ඇතුළු දස දෙනෙකුට අධික පිරිසකට අපරාධ චෝදනා ඉදිරිපත් කිරීමට හැකියාව ඇති බව එම නීති විශාරදයෝ පෙන්වා දෙති.
2015 පෙබරවාරි 27 වැනිදා සිදුවූ බව කියන ප්‍රශ්නගත බැඳුම්කර ගනුදෙනුව හේතුවෙන් ක්ෂණික මෙන්ම දීර්ග කාලීන පාඩු අත්විඳීමට රජයට සිදුවී ඇති බව බැඳුම්කර කොමිසම හමුවේ සාක්කි දුන් මූල්‍ය විශ්ලේෂකයින් පෙන්වා දුන් අතරම පර්පචුවල් ට්‍රෙෂරීස් සමාගම මෙන්ම එම සමාගම් සමූහයට අයත් සමාගම් පසුගිය කාලය තුළ රුපියල් කෝටි 1100 කට අධික ලාබ උපයා ඇති බව කොමිසමේදී හෙළි විය.
බැඳුම්කර ගනුදෙනු සඳහා ලංසු ඉදිරිපත් කළ හැකි රාජ්‍ය ආයතන බැඳුම්කර වෙන්දේසි වලදී ලංසු ඉදිරිපත් නොකිරීම හේතුවෙන් ඒ සඳහා ඉතා වාසි සහගත ලංසු ඉදිරිපත් කොට ඒවා ලබා ගැනීම හා එලෙස මිලදී ගත් ලංසු පසු අවස්ථාවලදී ද්විතියික වෙළෙඳ පොළේදී වැඩි මිල ගණන් වලට නැවත රාජ්‍ය ආයතන වලටම විකිණීම මඟින් අදාළ සමාගම ලාභ උපයා ඇති බවද කොමිසමේදී හෙළි විය.
