(දයාසීලි ලියනගේ)
ඇඳිරි නීතිය ක්‍රියාත්මක වෙන කාලයේදී රටේ ජනතාව වෙත අත්‍යවශ්‍ය ආහාර ද්‍රව්‍ය නිවෙස්වලටම ගෙන ගොස් බාරදීම සඳහා රජයේ නිලධාරීන්ට වගකීම් පැවරීමට රජය තීරණය කර ඇත.
ඒ අනුව සෑම දිස්ත්‍රික්කයකම දිස්ත්‍රික් ලේකම්වරුනට ඒ ඒ දිස්ත්‍රික්කවල ජනතාවට අවශ්‍ය ආහාර සැපයීමේ වගකීම පැවරීමට හිටපු ඇමැති බැසිල් රාජපක්ෂ මහතාගේ ප්‍රධානත්වයෙන් යුතු අත්‍යාවශ්‍ය ආහාර බෙදාහැරීමේ ජනාධිපති කාර්ය සාධක බළකාය ඊයේ (25) වැඩිදුරටත් සාකච්ඡා කර ඇත.
අත්‍යාවශ්‍ය ආහාර ද්‍රව්‍ය බෙදාහැරීම සඳහා එම ආහාර ද්‍රව්‍ය සොයාගැනීම බරපතල ප්‍රශ්නයක් බව හිටපු ඇමති සහ අත්‍යවශ්‍ය ආහාර ද්‍රව්‍ය බෙදාහැරීම පිළිබඳ ජනාධිපති කාර්යසාධක බලකායේ සභාපති බැසිල් රාජපක්ෂ මහතා කීය.
මෙරටට අත්‍යවශ්‍ය ආහාර ද්‍රව්‍ය ලබාදෙන රටවල් ගණනාවක් මේ වනවිට ඔවුන්ගේ අපනයනයන් අත්හිටුවා ඇති නිසා මෙරට ආහාර ද්‍රව්‍ය ගැන විශේෂ අවධානය යොමු කිරීමට සිදුවී ඇතැයිද ඔහු ප්‍රකාශ කළේය.
මෙම සාකච්ඡාවට බැසිල් රාජපක්ෂ මහතා ඇතුළු අමාත්‍යංශ ලේකම්වරු ඇතුළුව මහා පරිමාණයේ වෙළෙඳශාලා හිමියන්ද සහභාගිවී තිබුණි.
එහිදී භාණ්ඩ බෙදාහැරීම සඳහා ඒ ඒ ප්‍රදේශවල ත්‍රිරෝද රථ සහ ලොරි රථ යොදාගැනීමට දිස්ත්‍රික් ලේකම්වරයාට බල පවරා ඇති අතර රුපියල් 1500 ක වටිනාකම ඇති ආහාර මල්ලක් රුපියල් 1300 ක මුදලකට අලෙවි කරන ලෙසට ද මෙහිදී උපදෙස් දී ඇත. මෙම ආහාර බෙදාහරින පෞද්ගලික වාහනවලට මුදල් ගෙවිය හැකි ආකාරය ද සලකා බලන ලෙසට ද දැනුම්දී ඇත.
මැතිවරණ ඡන්ද පත්‍රිකා නිවෙස්වලට බෙදාදෙන ආකාරයට සෑම නිවසකටම ආහාර මල්ල ලබාදිය යුතු බවට ද මෙහිදී තරයේ උපදෙස් දී ඇත.
