සුජිත් හේවාජුලිගේ සහ ප්‍රසන්න සංජීව තෙන්නකෝන්
මන්ත්‍රීවරුන්ට තීරු බදු රහිත වාහන බලපත්‍ර ලබාදීම සම්බන්ධයෙන් ආණ්ඩුව ඇතුළේ කඹ ඇදීමක් හටගෙන තිබීම නිසා බලපත්‍ර නිකුත් කිරීම සම්බන්ධ අවසන් තීරණයක් ගැනීමට නොහැකිව ඇතැයි වාර්තා වේ. ආණ්ඩුවේ එක් පාර්ශ්වයක් වාහන බලපත්‍රය ලබාගත යුතු බව පවසද්දී, අනෙක් පාර්ශ්වය එය ලබා නොගත යුතු බව පැවසීමෙන් මෙම අර්බුදකාරී තත්ත්වය මතුව ඇති බව රජයේ ආරංචි මාර්ග සඳහන් කරයි.
ආණ්ඩුවේ එක් පාර්ශ්වයක් පවසන්නේ රට ආර්ථික වශයෙන් දැඩි අර්බුදයක පවතින අවස්ථාවක මන්ත්‍රීවරු තීරු බදු රහිත වාහන බලපත්‍රය ලබා ගතහොත් එය ජනතාව තුළ පිළිකුලක් වර්ධනය වීමට හේතු සාධක වනු ඇති බවයි. එය ආණ්ඩුවේ ඡන්ද පදනමටද බරපතළ තර්ජනයක් වනු ඇතැයි ඔවුහු වැඩිදුරටත් පෙන්වා දෙති.
කෙසේ වෙතත් ආණ්ඩුවේ තවත් මන්ත්‍රීවරු පිරිසක් පවසන්නේ, අවුරුදු ගණනකින් වාහන බලපත්‍රයක් ලබාගෙන නැති හෙයින් එය මේ මොහොතේදී ලබාගැනීම සුදුසු බවයි.
තීරු බදු රහිත වාහන බලපත්‍ර ඉදිරි මැතිවරණවලට කලින් ලබා දෙන ලෙස ඉල්ලා ආණ්ඩු පක්ෂයේ සහ විපක්ෂයේ මන්ත්‍රීවරු පිරිසක් කතානායක මහින්ද යාපා අබේවර්ධන මහතාට පසුගියදා ලිපියක් භාර දුන්හ. ඉන් අනතුරුව එම ලිපිය කතානායකවරයා විසින් ජනාධිපතිවරයාට භාරදෙනු ලැබීය.
මන්ත්‍රීවරුන්ගේ තීරු බදු රහිත වාහන බලපත්‍රයේ වටිනාකම රුපියල් කෝටි දෙකකට වැඩිය. වාහන බලපත්‍රය නොලැබුණහොත් ඉදිරි මැතිවරණවලට ඉදිරිපත් නොවන බවට මන්ත්‍රීවරු පිරිසක් ජනාධිපතිවරයාට දැනුම්දී ඇත. මේ අතර මන්ත්‍රීවරුන්ගේ වාහන බලපත්‍ර ඉල්ලීම පාර්ලිමේන්තු ගෘහ කාරක සභාවේදී ඉකුත්දා අනුමත කෙරිණි.
මේ අතර වාහන බලපත්‍රය ලබා ගැනීමේ සටනට එක්වන්නැයි ආණ්ඩු පක්ෂයේ සහ විපක්ෂයේ මන්ත්‍රීවරු පිරිසක් සෙසු මන්ත්‍රීවරුන්ටද බලපෑම් කරමින් සිටින බව ද දැනගන්නට ඇත. මේ අතර පාර්ලිමේන්තු මන්ත්‍රීවරුන්ට තීරු බදු රහිත වාහන බලපත්‍ර ලබාදීම සම්බන්ධයෙන් සමගි ජන බලවේගය තුළ මත ගැටුම් උග්‍ර අතට හැරවී ඇති බව අභ්‍යන්තර ආරංචි මාර්ග වාර්තා කරයි.
සමගි ජන බලවේගයේ පසු පෙළ මන්ත්‍රීවරුන් තීරු බදු රහිත වාහන බලපත්‍රය අත්‍යවශ්‍ය යැයි ප්‍රබල හඬක් මතු කරන ඔවුන් කියා සිටින්නේ ඉදිරි මැතිවරණ සඳහා අවශ්‍ය වියදම් සොයා ගැනීමට මෙම බලපත්‍රය අත්‍යවශ්‍ය බවය.
තීරු බදු රහිත බලපත්‍රය ලබා ගැනීම ප්‍රතික්ෂේප කිරීමේ කණ්ඩායම කියා සිටින්නේ එම බලපත්‍රය ලබාගෙන මැතිවරණයට ඉදිරිපත් වුවද පළක් නොවන බවය. එමගින් සිදුවන්නේ ජනතාව අතර පිරිහීමක් ඇතිවීම පමණක් බවය. තිරු බදු රහිත වාහන බලපත්‍රය ප්‍රතිකේෂ්ප කිරීමේ ස්ථාවරයේ විපක්ෂ නායක සජිත් ප්‍රේමදාස සහ පාර්ලිමේන්තු මන්ත්‍රී ලක්ෂ්මන් කිරිඇල්ල යන මහත්වරුන් තදබල ලෙස සිටිය ද මේ වනවිට විපක්ෂ නායකවරයා නිහඬ පිළිවෙතක් අනුගමනය කරන බව වාර්තාවේ. ඒ පසු පෙළ මහන්ත්‍රීවරුන්ගේ බලපෑම නිසා බව ද කියැවේ.
