ඩයනා උදයංගනී
 
වත්මන් රජය පිහිටවූ දින සිටම මුදල් අමාත්‍යාංශයත්, මහ බැංකුවත් පැවතියේ අගමැතිවරයා ප‍්‍රධාන එක්සත් ජාතික පක්‍ෂය යටතේ බැවින් රටේ ආර්ථික අර්බුදය පිළිබඳ වගකීම ජනාධිපතිවරයා යටතේ ඇති ජාතික ආර්ථික සභාවට පවරා  නිදහස් වීමට එ.ජා.පයට නොහැකි බව ශ්‍රී ලංකා නිදහස් පක්‍ෂ මාධ්‍ය ප‍්‍රකාශක, වරාය හා නාවුක කටයුතු අමාත්‍ය මහින්ද සමරසිංහ මහතා පැවසීය.
 
ජාතික ආර්ථික සභාව පිහිටුවා ගත වූයේ මාස 6ක් පමණ බව කී ඇමතිවරයා එතෙක් ආර්ථික කළමනාකරණය සම්බන්ධයෙන් සොයාබැලීම සිදුකළේ අග‍්‍රාමාත්‍යවරයාගේ ප‍්‍රධානත්වයෙන් යුත් ආර්ථික අනුකමිටුවක් මගින් බව ද සඳහන් කළේය.
 
අනවශ්‍ය ආනයන අඩු කර අපනයන වැඩි කළ යුතු බවත්, දේශීය කර්මාන්ත හා ව්‍යාපාරිකයින්ට අවස්ථාව දිය යුතු බවත් ජනාධිපතිවරයා පැවසුවේ ආර්ථික සභාව පත්කරන්නට වසර දෙකකට පෙර සිට බව කී ඇමතවරයා එම යෝජනා දැන් හෝ ක‍්‍රියාත්මක කිරීමට රේඛීය අමාත්‍යාංශ කටයුතු කිරීම ගැන සතුටු වන බව ද කීවේය.       
 
ඇමති මහින්ද සමරසිංහ මහතා මේ බව පැවසුවේ කොළඹ, ඩාර්ලි පාරේ පිහිටි ශ්‍රී ලංකා නිදහස් පක්‍ෂ මූලස්ථානයේදී අද (4) පැවති මාධ්‍ය හමුවේදී මාධ්‍යවේදියෙකු නැගූ පැනයකට පිළිතුරු දෙමිනි.