සිරංගිකා ලොකුකරවිට
"අපිට මේ රට බෙදන්න ඕන නෑ. අපි මේ රට ඒකීයව තියාගමු නමුත් බලය බෙදාගමු" යැයි දෙමළ ජාතික සංධානයේ පාර්ලිමේන්තු මන්ත්‍රී එම්. ඒ. සුමන්තිරන් මහතා අද (30) ගාල්ලේ දී පැවසීය.
නව ව්‍යවස්ථා වැඩපිළිවෙළ හා 20වන සංශෝධනය මැයෙන් ගාල්ල ක්‍රීඩා මණ්ඩප ශාලාවේ පැවති වැඩසටහනකදී ඒ මහතා එසේ පවසන ලදී.
එහිදී සුමන්තිරන් මහතා මෙසේ ද පැවසීය.
"රටේ ප්‍රචාරයක් යනවා නව ආණුඩුක්‍රම ව්‍යවස්ථාව ආවොත් රට දෙකට කැඩෙනවා කියලා, අපි එහෙම කියන්නේ නැහැ. අපි කියන ප්‍රධාන කාරණාව තමයි රට එකට තියෙන්න ඕන කියන එක.
නමුත් ආණ්ඩු බලය බෙදා හරින්න ඕන. අපි දැන් වෙනම රාජ්‍යයක් ඕන කියන ඉල්ලීම අතහැරලා තියෙන්නේ. දිගු කාලයක් තිස්සේ පැවති මේ ප්‍රශ්නය දැන් නිරාකරණය කරන්න කාලය ඇවිත් දැන් තියෙන සමගි ආණ්ඩුවෙන් මේ ප්‍රශ්නය විසඳා ගන්න බැරි වුනොත් කවදාවත් අවස්ථාවක් එන්නේ නැහැ.
අපිට මේක කරන්න පුළුවන් උනොත් ඉන් පසුව ජනවාර්ගික ප්‍රශ්නය කියලා දෙයක් නෑ"
එක්සත් වාමාංශික පෙරමුණේ ආචාර්ය ජයම්පතී වික්‍රමරත්න,ජනතා විමුක්ති පෙරමුණේ දකුණු පළාත් සභා මන්ත්‍රී නලීන් හේවගේ, ව්‍යවස්ථාව සම්බනධ මහජන අදහස් ලබාගැනීමේ කමිටුවේ සභාපති ලාල් විජේනායක යන මහත්වරුද මෙහිදී අදහස් දැක්වූහ.
