(විනීතා එම් ගමගේ)
ස්වාධීන ස්වෛරී රාජ්‍යයක් වන ශ්‍රී ලංකාවේ ආරක්ෂාව පිළිබඳව සෙවීමට ජපානයේ ආරක්ෂක ඇමැතිට කිසිදු අයිතියක් නැතැයි ජාතික සංවිධාන එකමුතුවේ විධායක සභික ප්‍රවීණ දේශපාලන විශ්ලේෂක මොහාන් සමරනායක මහතා ප්‍රකාශ කළේය.
හම්බන්තොට වරාය චීනයේ මිලිටරි අවශ්‍යතා වෙනුවෙන් භාවිත නොකළ යුතු යැයි ද ජපාන ආරක්ෂක අමාත්‍යවරයා මෙරට සංචාරයේ දී අනතුරු හැඟවීමක් කර ඇතැයි ද ස්වාධීන රාජ්‍යයක මෙවැන්නක් සිදුනොවිය යුතු යැයි ද හෙතෙම සඳහන් කළේය.
ලෝකයේ ස්වාධීන ස්වෛරී රාජ්‍යයන් වෙනුවෙන් පිහිටුවා ඇති ආයතනය වන එක්සත් ජාතීන්ගේ සංවිධානය මගින් රාජ්‍යයක ස්වාධීනත්වය වෙනුවෙන් පනවා ඇති මූලධර්ම හතෙන් අවසාන මූලධර්මය වන්නේ ඒ ඒ රාජ්‍යයන්හි අභ්‍යන්තර කටයුතුවලට ඇඟිලි නොගැසීම යැයි පෙන්වා දුන් සමරනායක මහතා ඒ අනුව ජපාන ආරක්ෂක ඇමeතිවරයා සිදුකර ඇත්තේ ශ්‍රී ලංකාවේ අභ්‍යන්තර කටයුතුවලට ඇඟිලි ගැසීමක් නොවේදැයි ප්‍රශ්න කළේය.
මොහාන් සමරනායක මහතා මේ අදහස් පළ කළේ ජාතික සංවිධාන එකමුතුවේ ප්‍රධාන කාර්යාලයේ අද (28) පැවැති මාධ්‍ය හමුවක් අමතමිනි. එහි දී සමරනායක මහතා වැඩිදුරටත් මෙසේ ද කියා සිටියේය.
‘ජපාන ආරක්ෂක අමාත්‍යවරයා මෙරටට පැමිණියේ ශ්‍රී ලංකාවේ ආරක්ෂක තත්ත්වය පිළිබඳ සොයා බැලීමට කියා වරාය අමාත්‍ය මහින්ද සමරසිංහ මහතා මාධ්‍ය හමුවක දී පවසා තිබුණා. එහෙම හොයන්න ජපානයට ඇති අයිතිය මොකක්ද? අපේ ජනාධිපතිට අගමැතිට ජපානයට ගිහින් එහේ ආරක්ෂක තත්ත්වය සොයා බලන්න පුළුවන් ද? මේ වගේ දේවල් රටේ සිදුවන්නේ යහපාලන ආණ්ඩුව බලයට පත්වූවායින් පසුවයි. රටකට ජාතියකට සිදුවිය හැකි ලොකුම පාඩුව මෙසේ ස්වාධීනත්වයට බාධා සිදුවීමයි.
මේ රටේ පවතින්නේ ධනවාදී නව ලිබරල්වාදී ආණ්ඩුවක් බව පෙනී යනවා. රටේ ඇත්ත නායකයා ජනාධිපති නොවෙයි අගමැතියි. දිගින් දිගටම මේ තත්ත්වය ඉදිරියට ගියොත් ශ්‍රී ලංකාව නමින් රාජ්‍යයක් ඉතිරිවෙන්නේ නැහැ. ඉතිරි වෙන්නේ බිමක් පමණයි. අපි නොහිටියත් අපේ දරුවන්ට රටක් ඉතිරි විය යුතුයි.’
