නාලක සංජීව දහනායක
කොළඹට රැස්වූ ජනතාව දැක දැකත් උද්ඝෝෂණය අසාර්ථක බව කිව හැක්කේ ආණ්ඩුවට කත් අදින කුහකයන්ට පමණක් යැයි ඒකාබද්ධ විපක්ෂයේ කැඳවුම්කරු, ගම්පහ දිස්ත‍්‍රික් පාර්ලිමේන්තු මන්ත‍්‍රී ප‍්‍රසන්න රණතුංග මහතා අද (6) නිවේදනයක් නිකුත් කරමින් සඳහන් කරයි.
එබැවින් ජනබල උද්ඝෝෂණය අසාර්ථක බවට ආණ්ඩුවේ මැති ඇමැතිවරුන් කරන ප්රකාශ සම්බන්ධයෙන් ඒකාබද්ධ විපක්‍ෂය කනගාටු නොවන බවද එම නිවේදනයේ සඳහන් වේ.
එම නිවේදනයේ මෙසේ ද දැක්වේ.
රට අඳුරු යුගයක් කරා රැගෙන යමින් තිබෙන යහපාලන ආණ්ඩුවට එරෙහිව තවත් එක් දැවැන්ත ජනතා විරෝධයක් කොළඹ දී පවත්වන්නට ලැබීම සම්බන්ධයෙන් සතුටු වන්නෙමු. බලයට පත් වී වසර තුනක් තිස්සේ ජාතික සම්පත් විකුණමින්, ජාතික ආරක්ෂාව විනාශ කරමින්, ජනතා මුදල් මංකොල්, කමින් රට අගාධයට ඇද දමන වර්තමාන ආණ්ඩුව, ලක්ෂ සංඛ්‍යාත ජනකායක් කොළඹට එක් රොක් වී දුන් පණිවුඩය තේරුම් ගත යුතු බව අප කල්පනා කරන්නෙමු.
ඒකාබද්ධ විපක්ෂයේ ජනබලය උද්ඝෝෂණය අසාර්ථක බවට ආණ්ඩුවේ මැති ඇමැතිවරුන් කරන ප්රකාශ සම්බන්ධයෙන් අපට කනගාටුවක් නැහැ. මන්ද ගල් ගසන්නේ පල ඇති රුකට බව අප හොඳින් දන්නා බැවිනි. කොළඹට රැස් වූ ජනතාව දැක දැකත් උද්ඝෝෂණය අසාර්ථක බව කිව හැක්කේ ආණ්ඩුවට කත් අදින කුහකයන් හට පමණකි. කවුරු කෙසේ කීවත් අද රටේ ජනබලයට ඇත්තේ ඒකාබද්ධ විපක්ෂයට බව නැවත වරක් තහවුරු වී තිබේ. අවලාද නොනගා හැකිනම් පළාත් සභා මැතිවරණය පවත්වන ලෙස අපි ආණ්ඩුවට අභියෝග කරමු.
