(*** නාලක සංජීව දහනායක)
ඉකුත් යහපාලන ආණ්ඩුව ත්‍රස්තවාදය වැළැක්වීමේ පනත යටතේ ගෝඨාභය රාජපක්ෂ මහතා අත්අඩංගුවට ගැනීමට සූදානම්වූ බව හිටපු පාර්ලිමේන්තු මන්ත්‍රී ආචාර්ය විජයදාස රාජපක්ෂ මහතා ඊයේ (2) පැවැසීය.
දේශපාලන දඩයමට විරුද්ධවූ නිසා ආණ්ඩුවේම ඇමැතිවරයකු වූ තමන්ට ආණ්ඩුව සමග ගැටීම් ඇතිවූ බවද ඔහු කීය.
රාජිත සේනාරත්න මහතාට ඇවන්ගාඩ් සමාගමෙන් වරින් වර මුදල් දෙන ලදයි චෝදනා කර විජයදාස රාජපක්ෂ මහතා ඒ සම්බන්ධයෙන් ලිපි ලේඛන තමන් සතුව තිබෙන බවද කීවේය.
ඒ පිළිබඳ චෙක්පත් කීපයක ඡායා පිටපත්ද ඔහු මාධ්‍ය හමුවේ පෙන්වීය.
බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු ප්‍රධාන කාර්යාලයේදී ඊයේ (2) පැවැති මාධ්‍ය හමුවකට එක්වෙමින් ඔහු මේ බව සදහන් කළේය.
හිටපු මන්ත්‍රීවරයා මෙසේද පැවැසීය.
අපේ රටේ අධ්‍යාපනය ලෝකයේ දියුණු රටවල මට්ටමට ගේන්න ඕන. මේ වනවිට අපේ රටේ ප්‍රාථමික, ද්විතීයික හා තෘතීයික අධ්‍යාපනය දරාගන්න බැරි විදියට බිඳ වැටිලා. මේ නිසා දරුවන්ට අධ්‍යාපනය ලැබීමේ සම අවස්ථාව ගිලිහීගොස් තිබෙනවා.
ඕනෑම කෙනෙකුට ජාත්‍යන්තර පාසල් ආරම්භ කරන්න පුළුවන්. ඒවායේ අයකරන මුදල සාමාන්‍ය කෙනෙකුට දරාගන්න බැහැ. ඒ ජාත්‍යන්තර පාසල්වල ලබාදෙන අධ්‍යාපනය සම්බන්ධයෙන් කිසිම කෙනෙක් හොයන්නේ නැහැ. එමෙන්ම සමාගමක් ලියාපදිංචි කරන ඕනම කෙනෙක්ට පුද්ගලික විශ්වවිද්‍යාලයක්ද ආරම්භ කරන්න පුළුවන්. මෙම පෞද්ගලික අධ්‍යාපන ආයතන නියාමනය කරන්න කිසිම ප්‍රතිපත්තියක් නැහැ.
ඒ නිසා මුල් අවුරුද්දතුළදී අධ්‍යාපන ප්‍රතිපත්තියක් හදාගන්න අපි කටයුතු කරනව. දේශපාලන පලිගැනීම් හා මැදිහත්වීම නිසා අධ්‍යාපනයේ බිඳ වැටීමක් තිබෙනවා. බොහෝවිට මැති ඇමතිවරුන්ගේ ලිපිවලට සුදුසුකම් නැති උදවිය විදුහල්පති තනතුරට පත්වෙනවා. අධ්‍යාපනය දේශපාලනීකරණයවීම ඉතාම බරපතළයි. ඉකුත් ආණ්ඩුවේ උසස් අධ්‍යාපන අමාත්‍යවරයා වශයෙන් මම ඉතාම කෙටි කාලයක් වැඩ කළා. මම ඒ ධූරය බාරගන්නාවිට අපේ රටේ ජාතික පසල් 353ක් තිබුණා. ඒ පාසල්වලින් විදුහල්පතිවරුන් හිටියේ පාසල් 10 කට පමණයි.
අනෙක් ජාතික පාසල් 343ම හිටියේ දේශපාලන අවශ්‍යතාමත පත්කළ වැඩබලන විදුහල්පතිවරුන්. එවැනි පාසල්වල අධ්‍යාපනය ඉතාම බරපතළ ආකාරයට කඩාවැටීම වළක්වන්න බැහැ. මම ඉකුත් වසරේදී විදුහල්පති පුරප්පාඩු පුරවන්න විභාගයක් පැවැත්වූවා. ඒ සදහා අයදුම්කරුවන් 17000ක් පෙනී සිටියා. ඉන් අයදුම්කරුවන් තුන්දහස් අටසිය අසූ එකක් සමත් වුණා. ඒ පිරිසෙන් එක්දහස් අටසිය පනස් අට දෙනෙක් බඳවා ගත්තා.
වැලිකඩ බන්ධනාගාරයේ සිදුවූ ඝාතනවලට එවකට ආරක්‍ෂක ලේකම්වරයා වූ ගෝඨාභය රාජපක්ෂ මහතා සම්බන්ධ බවට ප්‍රකාශ කළොත් තමන් නිදහස් කරන බවට එවකට අගමැතිවරයා වූ රනිල් වික්‍රමසිංහ මහතා පැවැසූ බව හිටපු බන්ධනාගාර කොමසාරිස්වරයා දේශපාලන පලිගැනීම සදහා පත්කළ කොමිසමේදී සාක්‍ෂි දෙමින් පවසනවා. වැලිකඩ ඝාතන සිද්ධිය සොයා බලන්න කියලා කමිටුවක් පත් කළේ මමයි. එය ස්වාධීනව කටයුතු කළ කොමිසමක්.
යහපාලන ආණ්ඩුව පත්වෙලා තුන්වැනි සතියේදි අරලියගහ මන්දිරයට පොලීසිය කැඳවා ඇවන්ගාර්ඩි ගනුදෙනුව සම්බන්ධයෙන් හිටපු ආරක්‍ෂක ලේකම්වරයා වූ ගෝඨාභය රාජපක්ෂ මහතා අත්අඩංගුවට ගන්නා ලෙසට උපදෙස් දුන්නේ කිසිම දේශපාලන බලයක් නැති කමිටුවක් විසිනුයි. ඒ කමිටුවේ සිටියේ රාජිත සේනාරත්න, පාඨලී චම්පික රණවක, මංගල සමරවීර, අනුර කුමාර දිසානායක වැනි අයයි. මම ඒවාට විරුද්ධ වුණ නිසා ආණ්ඩුව සමඟ ගැටීම් ඇතිවුණා. යහපාලන ආණ්ඩුවේ අවුරුදු පහක කාලය සම්පූර්ණයෙන්ම වැයවුණේ දේශපාලන දඩයම සඳහා යැයිද ඔහු පැවැසීය.
රත්නපුර දිස්ත්‍රික් අපේක්‍ෂක ඡානක වක්කුඹුර මහතා මෙසේ පැවැසීය.
තමන්ට ආණ්ඩුවක් හදන්න කිසිම හදිස්සියක් නැති බව සමඟි ජන බලවේගය පක්‍ෂයේ ජ්‍යෙෂ්ඨයකුවූ ලක්‍ෂ්මන් කිරිඇල්ල මහත්තය පැවැසුවා. ඔවුන්ට ආණ්ඩු හදන්න බැරිබවත්, සජිත් අගමැති වෙන්නේ නැතිබවත් ඔවුන් දැනටම පිළිගෙන ඉවරයි. රනිල් - සජිත් දෙන්නම අද දඟලන්නේ සිරිකොතේ බලය අල්ලගන්න මිස ආණ්ඩු හදන්න නෙවෙයි.
අපේ රජය පාතාලය මර්දනය කරලා සැමට නිදහසේ ජීවත්විය හැකි රටක් නිර්මාණය කරනවා. හැටනව ලක්‍ෂයක් දෙනා අපිට ඡන්දය දුන්නේ සැමට එකසේ නීතිය ක්‍රියාත්මක වන රටක් බිහිකරන්නයි.
කළුතර දිස්ත්‍රික් අපේක්‍ෂක යසපාල කෝරළගේ මහතාද මෙහිදී අදහස් දැක්වීය.
