මුදිතා දයානන්ද 
          
භාරකාර ආණ්ඩුවක් හැදීම මේ අවස්ථාවේ රට වෙනුවෙන් ගන්න තිබෙන යහපත්ම ක‍්‍රියාමාර්ගය යැයි පැපිලියාන සුනේත‍්‍රාදේවී පරිවේණාධිපති, ශ්‍රී ජයවර්ධනපුර විශ්ව විද්‍යාලයේ මහාචාර්ය මැදගොඩ අභයතිස්ස හිමියෝ අද (10) පැවසූහ.
 
අභයතිස්ස හිමියෝ මේ බව සඳහන් කළේ ජාතික විද්වත් භික්ෂු සංසදය පැපිලියාන සුනේත‍්‍රාදේවි පිරිවෙන් විහාරස්ථානයේ පැවැත්වූ මාධ්‍ය හමුවකදීය.                    
 
භාරකාර හෝ පරිවාස හෝ කුමන නමක් හැදුවද ඒ හදන ආණ්ඩුව තාවකාලික ආණ්ඩුවක් විය යුතු යැයිද ඒ තුළින් කිසිදු ව්‍යාවස්ථා වෙනසක් නොකළ යුතු යැයිද උන්වහන්සේ පැවසූහ.  
 
2015 මහ මැතිවරණයෙන් මහින්ද රාජපක්ෂ මහතා ජයග‍්‍රහණය කළේ නම් එවිටද සිදුවීමට නියමිතව තිබුණේ ජනපති මෛත‍්‍රීපාල මහතා යටතේ වන ආණ්ඩුවක අගමැතිකම මහින්ද රාජපක්ෂ මහතා දැරීම බවද මේ වන විට අගමැතිට වැඩි බලයක් ද පැවරී ඇති නිසා භාරකාර ආණ්ඩුවේ අගමැතිකම ඔහු භාර ගැනිමේ ගැටලූවක් නැති බවද උන්වහන්සේ පැවසූහ. 
 
දැන් කළ යුතු වන්නේ පරණ කෝන්තර අමතක කර දමා රට ගැන හිතා මේ ආණ්ඩුව ගෙදර යැවීමට කටයුතු කර වහා මැතිවරණයකට ගොස් ජනවරමක් සහිත ආණ්ඩුවක් පිහිටුවීම යැයි ද අභයතිස්ස හිමියෝ වැඩිදුරටත් පැවසූහ.