(ශාන්ත චන්ද්‍රසිරි)
රනිල් වික්‍රමසිංහ මහතා එක්සත් ජාතික පක්ෂය ප්‍රමුඛ සන්ධානයේ නායකත්වය සජිත් ප්‍රේමදාස මහතාට ලබා දුන්නේ ජනාධිපතිවරණය සේම මහ මැතිවරණයත් පරාජය වන බව දන්න නිසා යැයි දුම්රිය සේවා රාජ්‍ය අමාත්‍ය සී.බී. රත්නායක මහතා පැවැසීය.
තලවකැලේ, ලිඳුල, මටේකැලේ වත්තේ අද (22) පැවැති වතු කම්කරු හමුවකදී අමාත්‍යවරයා මේ බව පැවසීය.
එහෙදී වැඩිදුරටත් අදහස් දැක්වූ ඇමැතිවරයා මෙසේද පැවසීය.
‘‘මහ මැතිවරණය මෙහෙයවන්න රනිල් වික්‍රමසිංහ මහතා නැවතත් සජිත් ප්‍රේමදාස මහතාට නායකත්වය ලබා දී තිබෙනවා. ඒ ජනාධිපතිවරණය සේම ඉදිරි මහ මැතිවරණයත් පරාජයවන බව දන්න නිසයි.
ජනාධිපතිවරණය මෙහෙවන්න සජිත්ට දුන්නා. මොකද උණේ ඒක පරාදයි. එක්සත් ජාතික පක්ෂයට මහ මැතිවරණයේදී සිදුවන්නෙත් ජනාධිපතිවරණයේදී සිදුවු දෙයමයි. ඒ දේ පිළිබඳව අපි අප්‍රේල් 27 කතා කරමු.
ශ්‍රී ලංකා නිදහස් පක්ෂයත් පොහොට්ටුවත් එක්ව තරග කිරීම සම්බන්ධයෙන් කිසිඳු ගැටළුවක් නැහැ. එදා ගැටළුවක් තිබුණ නිසයි අපි වෙනම පක්ෂයක් හදා ගත්තේ. ඒ පක්ෂය ලඟට ශ්‍රී ලංකා නිදහස් පක්ෂය අද ඇවිත් ඉන්නවා.දැන් ඔවුන් අපිත් එක්ක එකතු උනාණේ. ඒ නිසා ඒ පිළිබඳව අපි ගැටළු හදා ගතයුතු නැහැ.
මැතිවරණයේදී අපේක්ෂකත්වයන් සම්බන්ධයෙන් අපි එක කතිකාවකට එනවා. පක්ෂ නායකයන්ගෙන් සැදුම්ලත් පක්ෂ නායක රැස්වීමක් තිබෙනවා. එම රැස්වීමේදී තීන්දු කර ගන්නවා ඉදිරි මැතිවරණයේ අපේක්ෂකයන් බෙදීයාම සම්බන්ධයෙන් අපි හැමදාම මැතිවරණයන්ට තරග කරන ලද්දේ සමගි පෙරමුණක් විදිහටයි.
අපි හැමදාම මැතිවරණයන්ට මුහුණ දෙන විට ඒ සඳහා අපේක්ෂකයන් තෝරා ගැනීමේ කටයුතු සිදු කළා. ඒ ඒ පක්ෂවලට දෙන්න පුළුවන් නියෝජිත ප්‍රමාණයන් අපි ඔවුන්ට ලබා දෙනවා. ඒක ගැටළුවක් කර ගන්න අවශ්‍ය නැහැ‘‘ යැයි ඇමැතිවරයා කීය.
