(චමිල් රූපසිංහ)
දශක කිහිපකයට පෙර තිබූ දේශපාලන සංස්කෘතිය පසුකාලීනව සම්පූර්ණයෙන්ම වෙනස් වූ බවත් වෛරය,ක්‍රෝධය,ඊර්ෂ්‍යාව,බොරුව,චරිත ඝාතනය පිටු දකින නව දේශපාලන සංස්කෘතියක අවශ්‍යතාව දැන් රටට තදින් දැනෙන බවත් කතානායක කරූ ජයසූරිය මහතා පැවසීය.
මහනුවර ඊ.එල් සේනානායක ළමා පුස්තකාලය මහනුවර මහ නගර සභාවේ මුදල් ප්‍රතිපාදන යටතේ ප්‍රතිසංස්කරණය කර විවෘත කිරීමේ උත්සවයට අද (05) සහභාගි වෙමින් ජයසූරිය මහතා මේ බව ප්‍රකාශ කළේය.
පාර්ලිමේන්තුව තුළත් ඉන් පිටතදීත් ගෞරවනීය ලෙස ජීවත් වෙමින් අන් අයගේ ගෞරවය ආරක්ෂා කරන පිරිසක් පාර්ලිමේන්තුවට තෝරා පත් කරගත යුතු බවත් එම දේශපාලන සංස්කෘතියට මුල පිරුම නව පාර්ලිමේන්තුවෙන් හෝ ඇතිවනු ඇතැයි තමන් විශ්වාස කරන බවත් කතානායකවරයා එහිදී පැවැසීය.
එහිදී වැඩිදුරටත් අදහස් දැක්වූ කරූ ජයසූරිය මහතා මෙසේ කීය.
‘‘මන්ත්‍රීවරයාගේ නාමයට ඉදිරියෙන් යොදන ගරු නාමය බලෙන් ලබාගත හැකි දෙයක් නෙමේ එය මහජන නියෝජිතයින් ජනතාව වෙතින් උපයා ගත යුතු දෙයක් ඩී.එස් සේනානායක මහතා වැනි අය එලෙස ජනතා ප්‍රසාදයට පත්වන ලෙස කටයුතු කළා.
කන්ද උඩරටින් බිහි වූ කෘතහස්ත දේශපාලනඥයෙකු වන ඊ.එල් සේනානායක මහතා ජනතාව වෙනුවෙන් තමන්ගේ ධනය පරිත්‍යාග කළ නායකයෙක්. ඔවුන් වැනි පිරිස් අද දේශපාලන ලෝකය තුළ විරලයි. එක්සත් ජාතික පක්ෂයේ ආරම්භක සාමාජිකයෙකු ලෙස ඊ.එල් සේනානායක මහතා පක්ෂයේ අභිවෘද්ධිය පිණිස කැපවීමෙන් කටයුතු කළ නායකයෙක්.
පොහොර සහනාධාරය මෙරටට හඳුනාවා දීමට එතුමා මූලිකත්වය ගෙන කටයුතු කළා. කතානායක ධූරය හොබවමින් එතුමා ගෞරවනීය පාර්ලිමේන්තුවක් ඇති කිරීමට එදා කැපවුණා. යැයි කතානායකවරයා පැවසීය.
ළමා පුස්තකාලය ඉදිරිපිට ස්ථාපිත කරන ලද දිවංගත ඊ.එල් සේනානායක මහතාගේ පිළිරුවක් විවෘත කිරීමද කතානායකවරයා අතින් සිදු කෙරුණි.
මෙම අවස්ථාවට මධ්‍යම පළාත් ආණ්ඩුකාර ලිලිත් යූ ගමගේ,පාර්ලිමේන්තු මන්ත්‍රීවරුන් වන ලක්ෂ්මන් කිරිඇල්ල,එම්.එච්.එම් හලීම්,ලකී ජයවර්ධන,මහනුවර පුරපති කේසර සේනානායක,උතුරු මැද හිටපු ආණ්ඩුකාර සරත් ඒකනායක,හිටපු පාර්ලිමේන්තු මන්ත්‍රී තිස්ස අත්තනායක,මහනුවර නාගරික කොමසාරිස් චන්දන තෙන්නකෝන් යන මහත්වරු ඇතුළු විශාල පිරිසක් සහභාගිවූහ.
