(චන්ද්‍රසේන ගමගේ)
බැඳුම්කර වංචාවට හවුල්වූවන් අත්අඩංගුවට ගන්නා ලෙස බල කළ පාර්ලිමේන්තු මන්ත්‍රී රංජන් රාමනායක මහතා අත්අඩංගුවට ගෙන ඇති නමුත්, වත්මන් ආණ්ඩුව බැඳුම්කර හොරු ආරක්ෂා කරමින් සිටිනා බව හම්බන්තොට දිස්ත්‍රික් පාර්ලිමේන්තු මන්ත්‍රී දිලිප් වෙදආරච්චි මහතා අද(05) පැවසීය.
කළමැටිය ප්‍රදේශයේ කොරියානු ආධාර යටතේ ඉදිකරන ලද නිවාසවල පදිංචිකරුවන්ට පානීය ජලය හා විදුලිය නොමැති වීම හේතුවෙන් මතු වූ ගැටළු ගැන විමසීම සඳහා කළමැටියට පැමිණි මන්ත්‍රීවරයා මාධ්‍යවේදියෙකු නැගූ ප්‍රශ්නයකට පිළතුරු සපයමින් එසේ පැවසීය.
ඒ මහතා මෙසේද කීය.
“මේ ආණ්ඩුව බලයට පැමිණියේ අපේ ආණ්ඩු කාලයේ බවට චෝදනා ලැබූ මහ බැංකු බැඳුම්කර වංචාවට සමබන්ධ වූවන්ට නීතිය ක්‍රියාත්මක කරනවා කියලායි. රංජන් රාමනායක මන්ත්‍රීවරයාත් නිරන්තරයෙන් කිව්වේ මහබැංකු වංචාවට සම්බන්ධ වූවන් අත්අඩංගුවට ගන්න කියලාටි. නමුත් දැන් වී තිබෙන්නේ හොරු අල්ලන්න කියපු අය අත්අඩංගුවට ගැනීමයි.
මහබැංකු බැඳුම්කර වංචාවට සම්බන්ධ අය අත්අඩංගුවට ගන්න නම් ගෝඨාභය රාජපක්ෂට ඡන්දය දෙන්න කියලා උදය ගම්මන්පිළ, විමල් වීරවංශ පසුගිය කාලය පුරා වේදිකාවල මොර දුන්නා. මේ රටේ මහා සංඝරත්නය හොරු අල්ලන්න ගෝඨාභයට ඡන්දය දෙන්න කියා මේ රටේ මහජනතාවගෙන් ඉල්ලීමක් කළා. ඒ අනුව මේ රටේ ජනතාව මේ ආණ්ඩුව බලයට පත් කළා.
මම අගමැතිවරයාගෙන් හා ජනාධිපතිවරයාගෙන් ඉල්ලීමක් කරනවා. මහබැංකු වංචාවට සම්බන්ධ අය අත්අඩංගුවට ගන්න කියලා” යැයිද මන්ත්‍රීවරයා කීය.
