ඉන්දික හේවාවිතාරණ
විෂය නිර්දේශ සම්පූර්ණ කර ගැනීමට ප්‍රමාණවත් කාලයක් නොලැබුණ නිසා මේ මස 25 වැනි දින සිට ආරම්භ වීමට නියමිත උසස් පෙළ විභාගය කල් දමන ලෙස සිසුහු හා මව්පියන් පිරිසක් බලධාරීන්ගෙන් ඉල්ලා සිටිති.
මේ අනුව උසස් පෙළ විභාගය ලබන මස 25 වැනි දිනෙන් පසු පැවැත් වීමට අදාළව ජනාධිපති අනුර කුමාර දිසානායකගෙන් හා අධ්‍යපාන බලධාරීන්ගෙන් මේ වන විට ඉල්ලීමක් කර තිබෙන බවද එම පිරිස් පවසති. ඉල්ලීමට නිසි ප්‍රතිචාර නොමැති නිසා විභාගය කල් දැමීමට නිර්දේශයක් ලබා දෙන ලෙස ඉල්ලා පෙරේදා (01දා) ශ්‍රී ලංකා මානව හිමිකම් කොමිසමෙන් ඉල්ලීමක් කළ බවද එම පිරිස් සඳහන් කරති.
2022 වසරේදී උසස් පෙළ විභාගයට පෙනී සිටි සිසුන්ට උසස් පෙළ විෂය නිර්දේශය හැදෑරීමට දින 1137ක් හා 2023 කණ්ඩායමට දින 1029ක් ලැබී තිබුණු බවද ඔවුහු පෙන්වා දෙති.
එහෙත් මේ මස 25 වැනි දින උසස් පෙළ විභාගය ආරම්භ වුවහොත් 2024 උසස් පෙළ විභාගයට පළමු වරට පෙනී සිටි කණ්ඩායමට ලැබෙන්නේ දින 907ක කාලයක් පමණක් නිසා උසස් පෙළ විභාගය දෙසැම්බර් මස 25 සිට හෝ ඉන් පසු පැවැත්විය යුතු බව ඔවුහු සඳහන් කරති.
අදාළ ඉල්ලීම් ලබා දීමට බලධාරීන් කටයුතු නොකළ හොත් දරුවන්ගේ අයිතිවාසිකම් දිනා ගැනීම සඳහා ශ්‍රේෂ්ඨාධිකරණයට යාමට කටයුතු කරන බවත් මීට අදාළ නීති උපදෙස් ලබා ගනිමින් තිබෙන බවත් අසාධාරණයට පත් සිසුන්ගේ දෙමාපියෝ සඳහන් කරති.
මේ වන විට පාර්ලිමේන්තු මැතිවරණයේ ප්‍රචාරක කටයුතු ආරම්භ වී තිබෙන නිසා එම ක්‍රියාවලියෙන්ද ඇතැම් සිසුන්ගේ අධ්‍යාපනයට බාධා සිදුවෙමින් තිබෙන බව ඔවුහු පෙන්වා දෙති. උසස් පෙළ විභාගය නියමිත දිනවල පැවැත්වෙන බවත් ඊට අදාළ කාලසටහන විභාග දෙපාර්තමේන්තුවේ නිල වෙඩ් අඩවියෙන් බාගත කරගත හැකි බවත් විභාග දෙපාර්තමේන්තුව සඳහන් කරයි.
මෙවර උසස් පෙළ විභාගය ලබන මස 25 සිට දෙසැම්බර් 20 වැනිදා දක්වා පැවැත්වීමට සියලු කටයුතු සූදානම් කර තිබෙන බවත් ඒ සඳහා අයැදුම්කරුවන් 333,185 දෙනෙකු පෙනී සිටීමට නියමිත බවත් ඉන් අයැදුම්කරුවන් 253,390ක් පාසල් සිසුන් බවත් පෞද්ගලික අයැදුම්කරුවන් 79,795ක් සිටින බවත් එම දෙපාර්තමේන්තුව පවසයි.
