අමිල චින්තක ගමගේ
දීර්ඝ කාලයක් තිස්සේ තැපැල් දෙපාර්තමේන්තුවට සේවකයන් බඳවා නොගැනීම නිසා පුරප්පාඩු 7000 ක් ඇති වී තිබෙන බව තැපැල් සේවක වෘත්තීය සමිති එකමුතුවේ කැඳවුම්කරු චින්තක බණ්ඩාර පවසයි.
වැඩ වර්ජනය අත්හැරියත් සේවක ගැටලු‍වට ඉක්මනින් විසඳුමක් නොලැබෙන්නේ නම්, නැවත24 වැනිදා වැඩ වර්ජනයකට යොමුවන බවද ඔහු සඳහන් කළේය. එකවර සේවක පුරප්පාඩු 7000 ම පුරවන ලෙස ආණ්ඩුවට බලපෑම් නොකරන බවත්, තැපැල් දෙපාර්තමේන්තුව අකර්මණ්‍ය නොවී පවත්වාගෙන යෑමට අවශ්‍ය අවම සේවක සංඛ්‍යාවවත් ඉක්මනින් බඳවා ගන්නා ලෙස ඉල්ලීම් කරන බවත් ඒකාබද්ධ තැපැල් සේවක වෘත්තීය සමිති එකමුතුවේ කැඳවුම්කරු
ප්‍රකාශ කළේය.
මේ සම්බන්ධව නියෝජ්‍ය තැපැල්පති රාජිත රණසිංහ මහතාගෙන් ඉරිදා ලංකාදීපය කළ විමසීමේදී ඔහු සඳහන් කළේ සේවකයන් 7000 ක හිඟයක් පවතිනවා යැයි වෘත්තීය සමිති කරන චෝදනාව බොරුවක් බවත්, සැබැවින්ම හිඟයක් පවතින්නේ 1935ක සේවක ප්‍රමාණයක් බවත්ය. රට පුරා ලියාපදිංචි ආදේශකයන් 3000 ක පමණ ප්‍රමාණයක් අවශ්‍යව පවතින බව නියෝජ්‍ය තැපැල්පතිවරයා සඳහන් කළේය. එසේම තැපැල් සේවකයන් මෙම වැඩ වර්ජනයට එක්වූයේ තැපැල් දෙපාර්තමේන්තුවේ පුරප්පාඩු පිරවීම සඳහා සේවකයන් බඳවා ගැනීමට කටයුතු කරමින් තිබියදී බවද ඔහු සඳහන් කළේය.
