ඉන්දික හේවාවිතාරණ
වෛද්‍යවරුන්ගේ විශාල හිඟයක් ඇති වී තිබියදීත් පසුගිය වසරේ නොවැම්බර් මාසයේදී
සීමාවාසික පුහුණුව අවසන් කළ වෛද්‍යවරුන් 1390 ක් වෛද්‍ය සේවයට බඳවාගැනීම් දිගින් දිගටම ප්‍රමාද කරමින් සිටින
බව රජයේ වෛද්‍යපීඨ
ශිෂ්‍ය දෙමාපිය
සංගමය සඳහන් කරයි.
මීට අමතරව, මේ වසරේ පෙබරවාරි මාසයේදී වෛද්‍යපීඨ අවසන් විභාගයට පෙනී සිටි දහසකට අධික වෛද්‍ය ශිෂ්‍යයින් ප්‍රමාණයක් තවමත් සීමාවාසික පුහුණුවට බඳවා ගෙන නොමැති අතර මෙම කණ්ඩායම් මේ වසරේ නොවැම්බර් මාසයේදී සීමාවාසික පුහුණුවට බඳවා ගැනීමට සැලසුම් කර තිබෙන
බවද පෙන්වා දෙයි.
ප්‍රධාන රෝහල්වල විශාල ලෙස වෛද්‍යවරුන්ගේ හිඟයක් ඇති වී තිබෙන නිසා අවසන් විභාගයට පෙනී සිටින දහසකට අධික පිරිස කඩිනමින් සීමාවාසික පුහුණුවට බඳවා ගැනීමේ හැකියාව තිබෙන බවත් වෛද්‍ය ශිෂ්‍යයින්ට නිවෙස්වලට වී මාස හයක් හතක් රැඳී සිටීමට සිදුවීම එම සිසුන්ට සිදුකරණ අසාධාරණයක් බවත් එම සංගමය සඳහන් කරයි.
රට පුරා රෝහල්වල විවිධ වෛද්‍ය ඒකක අලු‍තින් එක්වෙමින් තිබෙන නිසා සීමාවාසික පුහුණුව අවසන් කර සිටින 1390 ට පත්වීම් ලිපි ලබා දී රාජ්‍ය සේවයට එක් කර පුරප්පාඩු පවතින ඒකකවලට අනුයුක්ත කරන ලෙසට සෞඛ්‍ය බලධාරීන්ගෙන් ඉල්ලා සිටින බවද කියා සිටියේය.
දැනට රෝහල්වල එක්දහස් තුන්සියකට වැඩි පිරිසක් සායනික පුහුණුව ලබමින් සිටින බවත් මෙම පිරිසගේ පුහුණුව මේ වසරේ නොවැම්බර් මාසයේදී අවසන් වන නිසා දැනට පුහුණුව අවසන් කර සිටින පිරිස් රාජ්‍ය සේවයට බඳවා ගැනීම් ප්‍රමාද කළහොත් ඉදිරියේදී විශාල පිරිසක් එකවර බඳවා ගැනීමට සිදුවන බවද ඔහු සඳහන් කළේය.
සීමාවාසික පුහුණුව අවසන් කිරීමෙන් පසු වෛද්‍ය සේවාවට බඳවා ගැනීම් ප්‍රමාද වීම නිසා එම අවස්ථාවෙදීත් මෙම පිරිස්වලට අසාධාරණයක් සිදුවන බවත් වෛද්‍ය පත්වීම ලබා දෙන තෙක් රාජ්‍ය සේවයේ බොහෝ අයිතිවාසිකම් මෙම පිරිසට අහිමි බවද එම සංගමය සඳහන් කරයි.
