- වැඩිම හිඟය නිර්වින්දන අංශයේ
- රට හැර යන්නන් '' බ්ලැක් ලිස්ට් '' කිරීමත් නැවතිලා
සුජිත් හේවාජුලිගේ
රජයේ රෝහල්වල අංශ නවයක විශේෂඥ වෛද්‍යවරුන්ගේ දැඩි හිඟය හේතුවෙන් එම අංශවල ප්‍රතිකාර සේවා කටයුතුවලට බරපතළ බලපෑම් එල්ල වී ඇතැයි සෞඛ්‍ය අංශ ආරංචි මාර්ග සඳහන් කරයි.
වැඩිම හිඟය පවතින්නේ නිර්වින්දන විශේෂඥ වෛද්‍යවරුන්ගේ බව එම ආරංචි මාර්ග පවසයි.
එසේම ප්ලාස්ටික් ශල්‍ය කර්ම පිළිබඳ විශේෂඥ වෛද්‍යවරුන්ගේද ළමා රෝග පිළිබඳ විශේෂඥ වෛද්‍යවරුන්ගේද බරපතළ හිඟයක් පවතී.
මෙයට අමතරව ශල්‍ය විශේෂඥ වෛද්‍යවරුන්ගේද රුධිර පාරවිලයන පිළිබඳ විශේෂඥ වෛද්‍යවරුන්ගේ ද ලිංගාශ්‍රිත රෝග පිළිබඳ විශේෂඥ වෛද්‍යවරුන්ගේද නව ජන්ම අංශ විශේෂඥ වෛද්‍යවරුන්ගේ ද ප්‍රජා විශේෂඥ වෛද්‍යවරන්ගේද ස්නායු විශේෂඥ වෛද්‍යවරුන්ගේද හිඟයක් පවතින බව සෞඛ්‍ය අංශ ප්‍රධානීහු පෙන්වා දෙති.
රජයේ රෝහල්වල විශේෂඥ වෛද්‍යවරුන් 2800ක් පමණ සිටිය යුතු වුවත් දැනට සිටින්නේ 2150ක් පමණක් බව ආරංචි මාර්ග සඳහන් කරයි.
විශේෂඥ වෛද්‍යවරුන් දහස් ගණනක් රට අතහැර විදේශයන්ට ගොස් සිටින අතර ඉන් වැඩි පිරිසක් නිර්වින්දන විශේෂඥ වෛද්‍යවරුන් බව දැනගන්නට ඇත.
මේ අතර රට අතහැර යන වෛද්‍යවරුන් අසාදු ලේඛනගත කිරීමේ වැඩපිළිවෙළ කාලයක සිට අඩපණව ඇතැයි ආරංචි මාර්ග සඳහන් කරයි. විගණන අංශ වසර ගණනාවක් තිස්සේ එම වැඩපිළිවෙළ ක්‍රියාත්මක කරන ලෙස දැනුම් දුන්නද මෙතෙක් එය සිදුවී නොමැති බව පැවසේ.
එසේම වෛද්‍ය සභාව එම වෛද්‍යවරුන්ගේ ලියාපදිංචිය අවලංගු කරන්නේ නම් මෙලෙස රට හැර යෑම වැළැක්විය හැකි බව සෞඛ්‍ය ක්ෂේත්‍රයේ බොහෝ දෙනා පෙන්වා දෙති.
විශේෂඥ වෛද්‍යවරයෙකු බිහිකිරීමට රජය රුපියල් එක්කෝටි පනස් ලක්ෂයක් පමණ වැය කරන බව පෙන්වා දෙන සෞඛ්‍ය අංශ වෛද්‍යවරුන් රට හැර යෑමෙන් රටට විශාල පාඩුවක් සිදුවන බවද සඳහන් කළේය.
