(අජන්ත කුමාර අගලකඩ)
එක්සත් ජාතික පක්ෂයේ ජනාධිපතිවරණ අපේක්ෂකයා අගමැති රනිල් වික්‍රමසිංහ මහතාද, නියෝජ්‍ය නායක සජිත් ප්‍රේමදාස මහතාද, එසේත් නැතිනම් කතානායක කරු ජයසූරිය මහතාද යන්න බදාදා (25) දිනයේදී තීරණය කරනු ඇතැයි දැන ගන්නට තිබේ.
එජාපයේ කෘත්‍යාධිකාරී මණ්ඩලය අගමැති රනිල් වික්‍රමසිංහ මහතාගේ ප්‍රධානත්වයෙන් බදාදා දිනයේ රැස්වීමට නියමිතව ඇති අතර එහිදී ජනාධිපති අපේක්ෂකයා තීරණය කරනු ඇතැයි වාර්තාවේ. එක්සත් ජාතික පක්ෂයේ ජනාධිපතිවරණ අපේක්ෂකත්වය නියෝජ්‍ය නායක සජිත් ප්‍රේමදාස මහතාට ලැබිය යුතු බවට එක්සත් ජාතික පෙරමුණේ සෙසු පක්ෂ නායකයින්ද එජාප වෙත දන්වා ඇතැයි දේශපාලන ආරංචිමාර්ග කියයි.
රවුෆ් හකීම්, පාඨලී චම්පික රණවක, මනෝ ගනේෂන්, පී. දිගම්බරන්, රිෂාඩ් බදියුදීන් යන අමාත්‍යවරු සජිත් ප්‍රේමදාස මහතාට සහාය දැක්වීමේ තීරණයකට දැනටමත් එළඹ ඇත.
තමා ස්ථිර වශයෙන්ම ජනාධිපතිවරණයට ඉදිරිපත් වන බව සජිත් ප්‍රේමදාස මහතා එජාප සමග කටයුතු කරන සෙසු පක්ෂ නායකයින්ට දැනුම්දී ඇතැයි ද දේශපාලන ආරංචිමාර්ග කියයි. මේ අතර එක්සත් ජාතික පෙරමුණු මන්ත්‍රී කණ්ඩායමේ සජිත් ප්‍රේමදාස මහතාට සහාය ලබාදෙන මන්ත්‍රීවරු කණ්ඩායම ගිය බ්‍රහස්පතින්දා උදේ වරුවේ පාර්ලිමේන්තු සංකීර්ණයේදී එජාප සභාපති අමාත්‍ය කබීර් හෂීම් මහතාගේ ප්‍රධානත්වයෙන් රැස්වී ඇති අතර එහිදී ද සජිත් ප්‍රේමදාස මහතා ජනපති අෙප්ක්ෂකයා විය යුතු බවට සියලු දෙනාම තීරණයකට පැමිණ ඇතැයි ද වාර්තා වේ.
