(කාංචන කුමාර ආරියදාස සහ කග කරුණාරත්න)

ඇළහැර බකමූණ කුමාර ඇල්ල ප්‍රදේශයේ ජන ජීවිතයට හානි වන ලෙසින් හැසිරුණු වන අලියකු අල්ලා ගස් බැඳීමට අද (12) වනජීවී නිලධාරීහු සමත් වූහ.

පසුගියදා එම ප්‍රදේශයේ නිවසක් ආසන්නයේ සිටි පුද්ගලයකු පහරදී ඝාතනය කර නිවාස කිහිපයක් කඩා බිඳ දැමීම සහ වගාවන් රැසකට මෙම තනි අලියා හානි කළැයි ප්‍රදේශවාසීහු උද්ඝෝෂණය කළහ. 

පසුව වනජීවී දෙපාර්තමේන්තු නිලධාරීන් මෙම වන අලියා 12 වැනිදා ප්‍රථම අල්ලා රැගෙන යන බවට පොරොන්දු වීමෙන් පසුව විරෝධතාකරුවන් ඉවත්වූ අතර වනජීවී නිලධාරීහු එදින සිට මෙම ප්‍රදේශයේ වන අලියාගෙන් සිදුවන හානි අවම කිරීම සඳහා රැකවල්ලා සිටියහ.

ගිරිතලේ  පශු  වෛද්‍ය කණ්ඩායම සහ වයඹ පළාත් බාර පසු වෛද්‍ය නිලධාරීන් ඒකාබද්ධ වී ඊයේ (11) රාත්‍රී සිට මෙම වන අලියා අල්ලා ගැනීම සඳහා මෙහෙයුම ක්‍රියාත්මක කර තිබිණි.

මේ වන විට අල්ලා ගස් බැඳ සිටින වන අලියා වයස අවුරුදු 35ක පමණ වන බව වනජීවී නිලධාරීහු පවසති.

මෙම වන අලියා ඇල්ලීම සඳහා 25 දෙනෙකුගෙන් යුත් වනජීවී නිලධාරීන් කණ්ඩායමක් දින  එක හමාරක පමණ මෙහෙයුමක් ක්‍රියාත්මක කර තිබිණි.

ඡායාරූපය - කාංචන කුමාර ආරියදාස

ඡායාරූප - කග කරුණාරත්න

(වීඩියෝ - කාංචන කුමාර ආරියදාස )