හරිත කෘෂිකර්ම ව්‍යාපෘතිය හේතුවෙන් මෙරට වී අස්වැන්න සියයට 20ත් 25ත් අතර ප්‍රමාණයකින් අඩුවනු ඇති බවට පුරෝකථනය කර ඇතැයි සම කැබිනට් ප්‍රකාශක වැවිලි අමාත්‍ය වෛද්‍ය රමේෂ් පතිරණ මහතා පසුගියදා ප්‍රකාශ කර තිබිණි. කැබිනට් තීරණ දැනුම් දීමේ මාධ්‍ය හමුවකදී මේ ප්‍රකාශය කර තිබූ රමේෂ් පතිරණ මහතා එසේ වුවද උත්සව සමයේදී ආහාර අර්බුදයක් එනු ඇති බවට ජනතාව බිය විය යුතු නැති බව ද එවන් ගැටලු‍වක් පැමිණියහොත් එයට මුහුණ දෙන වැඩපිළිවෙළක් රජය සතු බව ද සඳහන් කර තිබිණි.

මෙරට වී අස්වැන්න සියයට 25කින් අඩුවනු ඇති බවට අනාවැකි පළ වී තිබේ නම් ඒ සම්බන්ධයෙන් දැන් සිටම සැලසුම් සකස් කිරීම රජයේ වගකීමය. අස්වැන්න අඩු වන විට ආහාර අර්බුදයක් එනු ඇති බවට ජනතාව පළකරන බිය සහේතුකය. වෙන මොනවා නැතත් කන්න තිබෙන දේත් හිඟ වුණොත් ජනතාවට යන්න තැනක් නැත. සියයට 25ක් යනු අස්වැන්නෙන් හතරෙන් එකකි.

එවැනි තත්ත්වයකදී රටේ ක්‍රියාත්මක සහල් මාෆියාව ද තවදුරටත් සක්‍රීය වන බවත් වෙළෙඳපොළේ සහල් හිඟය දෙගුණ තෙගුණ වී මිල ගණන් දැරිය නොහැකි මට්ටමටත් එහා යනු ඇති බවත් ජනතාව අත්දැකීමෙන් දනිති. මේ නිසා ඔවුන් බියට පත්වීම අරුමයක් නොවේ. ආණ්ඩුව කළ යුත්තේ ජනතාව බිය නොවිය යුතු බවට ප්‍රකාශ නිකුත් කිරීම නොව එයට මුහුණ දීමට ඵලදායී වැඩපිළිවෙළක් කල් තබාම ආරම්භ කිරීමය. රජය සතුව වැඩපිළිවෙළක් තිබෙන බව ප්‍රකාශ කිරීම පමණක් ප්‍රමාණවත් නැත.

මෙයට හොඳම උදාහරණයක් සැපයෙන්නේ මරඳගහමුල සහල් වෙළෙඳපොළෙනි. දකුණෙන් සහ නැගෙනහිරින් පවා සහල් ලැබෙන මරඳගහමුල සහල් මිල දත්ත සටහන්කරු අපගේ ‘ලංකාදීප’යට ප්‍රකාශ කර තිබුණේ මේ වසරේ වී අස්වනු අඩුවීම නිසා සහල් මිල මේ දිනවල ඉහළ යමින් පවතින බවය. වී අස්වනු නෙළන කාලයේදී සාමාන්‍යයෙන් සහල් මිල අඩු විය යුතු වුවත් මෙවර එය සිදුවී නැත. මේ හේතුවෙන් සුදු කැකුළු කිලෝවක තොග මිල පවා රුපියල් 150-155 දක්වා වැඩි වී ඇති බව ද දත්ත සටහන්කරු ඩී. විජේරත්න මහතා ප්‍රකාශ කර තිබිණි. උත්සව සමයේදී සහල් මිල තවදුරටත් ඉහළ යනු ඇති බවට ද එහිදී සඳහන් විය.

ඒ අනුව පැහැදිලි වන්නේ අමාත්‍ය රමේෂ් පතිරණ මහතා ප්‍රකාශ කරන ආහාර අර්බුදය දැන් සිටම ඇරඹී තිබෙන බවය. මහ කන්නයේ වී අස්වැන්න යම් ප්‍රමාණයකට අඩු වුවද රටේ ආහාර හිඟයක් ඇතිවීමට ඉඩක් නැති බවට කෘෂිකර්ම ඇමැති මහින්දානන්ද අලු‍ත්ගමගේ මහතා පසුගියදා කර තිබූ ප්‍රකාශය ද ඒ අනුව අභියෝගයට ලක්වෙයි. වෙළෙඳපොළ තුළ සහල් මිල දැරිය නොහැකි මට්ටමකට ඉහළ යන්නේ ආහාර හිඟයක පෙර නිමිත්තක් වශයෙනි. සැපයුම අවශ්‍ය තරම් තිබේ නම් සහල් මිල මේ ආකාරයට ඉහළ නොයන බව තේරුම් ගැනීමට කෘෂිකර්ම විශේෂඥයකු විය යුතු නැත. සහල් හිඟ වනවිට මුලින්ම සිදුවන්නේ මිල ගණන් ඉහළ යාමය. ඊළඟට තවදුරටත් අස්වැන්න අඩුවන්නේ නම් වෙළෙඳපොළ තුළ සහල් හිඟවීමට මහ ලොකු කාලයක් යන්නේ නැත.

උත්සව සමය වනතුරු නොසිට සහල් ඇතුළු ආහාර ද්‍රව්‍ය හිඟ නොවීමට දැන් සිටම සැලසුම් සකස් කළ යුතු බව අප කියන්නේ මේ හේතුවෙනි. බොහොමයක් ආණ්ඩු ප්‍රශ්නවලට පිළිතුරු සොයන්නේ ප්‍රශ්නය ගැටලු‍ බවට පත්වී ගැටලු‍ව අර්බුදයක් බවට ද පත්වීමෙන් පසුවය. ප්‍රශ්නයකට ගැටලු‍වකට පිළිතුරක් සොයාගත හැකි වුවද අර්බුදයකදී පිළිතුරුවලින් පලක් නැත. අර්බුදවලදී අවශ්‍ය වන්නේ විසඳුමකි. සහල් මිල ගැටලු‍වක් වනවිට ඊළඟට ඇතිවිය හැකි ආහාර හිඟය අප දැකිය යුත්තේ අර්බුදයක් වශයෙනි. ඊට ඇති එකම විසඳුම කල් තබා සැලසුම් හැදීම පමණි.

එසේ කල් තබා සැලසුම් නොකිරීමෙන් ලැබිය හැකි භයානක ප්‍රතිඵල අප ඇස් ඉදිරියේ මේ දිනවල දැකගන්නට තිබේ. තෙල් අර්බුදයක් සහ විදුලිය අර්බුදයක් හටගන්නා බව පැහැදිලිව පුරෝකථනය වෙද්දීත් ආණ්ඩුව ඒවාට පැලැස්තර විසඳුම් සොයමින් සිටියා හැර එය අර්බුදයක් කරා නොයාමට විධිමත් සැලැස්මක් හැදුවේ නැත. මුලින් තෙල් මිල වැඩි විය. ඊළඟට තෙල් හිඟ විය. දැන් වරායෙන් තෙල් මුදාගැනීම සිදුවන්නේ සතියකට දෙකකට ප්‍රමාණවත් තරමිනි. මෙය කවදාවත් මේ රටේ නොතිබුණු අර්බුදකාරී තත්ත්වයකි.

තව මාසයක් පමණ හරි වැස්සක් නොලැබුණොත් රට පැය ගණනාවක් අඳුරේ තැබීමට තරම් විදුලි කප්පාදුවකට රට තල්ලුවන බව ඊයේ වාර්තා විය. කල් තබා සැලැස්මක් සකස් කර එයට අනුගත වී තීන්දු තීරණ ගත්තා නම් මෙවැනි විනාශකාරී තත්ත්වයක් උදාවන්නේ නැත. හරිත කෘෂිකර්මය ගැන වුවද කිව යුත්තේ එයමය. ක්‍රමවත් සහ විධිමත් සැලැස්මකින් තොරව එය ක්‍රියාත්මක කිරීමට යාමෙන් අද රට ආහාර අර්බුදයකට තල්ලු‍ වී එය රජයට ද මහත් හිසරදයක් බවට පත්ව තිබේ.

ආහාර අර්බුදයක් ඇතිවීම විදුලිය කප්පාදුවක් මෙන් නොවේ. විදුලිය නැතිනම් ඒ කාලය තුළ ඉටිපන්දමක් හෝ පත්තු කරගෙන අඳුර දුරු කරගත හැක. එහෙත් ආහාර නැති වුවහොත් එය ආලෝකය පිළිබඳ ගැටලු‍වක් නොව ජීවිතය රැක ගැනීම පිළිබඳ අර්බුදයකි. ඉන්පසුව සැලැස්මක් ගැන කතා කිරීමත් පලක් නැත.