අපේ රට මුහුණ දී සිටින බරපතළ ඛේදවාචකයේ සැබෑ ස්වරූපය පෙන්නුම් කරන අදහස් තුනක් සංක්ෂිප්තව එසේ දැක්විය හැකිය. රට යථා තත්ත්වයට ගෙන ඒමට දැරිය යුතු ආයාසය කෙතරම්ද යන්න එයින් පෙන්නුම් කරයි. මෙවැනි ඛේදජනක අවස්ථාවක සියලුදෙනා එකට එක්වී එකම අරමුණක පිහිටා කටයුතු කිරීම අවශ්‍ය වෙයි. එහිදී විපක්ෂනායක මහින්ද රාජපක්ෂ මහතා යහපත් ආදර්ශයක් පෙන්වා දී තිබේ. දේශපාලන වාදභේද පසෙකට දමා මේ අවස්ථාවේදී රටේ ආරක්ෂාව තහවුරු කිරීමට තමන්ට ලබාදිය හැකි දායකත්වය උපරිමව ලබාදීමට ඒ මහතා කටයුතු කරමින් සිටින බව පෙනී යයි. විශේෂයෙන්ම ම්ලේච්ඡ ත්‍රස්තවාදී ප්‍රහාරවලින් වෙළීගොස් තිබූ තිස් වසරක යුද්ධයක් නිම කිරීමට යුද පිටියේ සිට දායකත්වය ලබාදුන් හිටපු ත්‍රිවිධ හමුදා ප්‍රධානීන්, පොලිස්පතිවරුන් ඇතුළු හිටපු ආරක්ෂක ප්‍රධානීන් සම්බන්ධ කර ගැනීම විපක්ෂනායක වශයෙන් ඔහු තමන්ට පැවැරී ඇති වගකීම ඉටු කිරීමක් වශයෙන් සැලකිය හැකිය.

 

බරපතළ ත්‍රස්ත ප්‍රහාරයක කම්පනයෙන් යුත් රටක ඉදිරි ආරක්ෂාව තර කිරීමේදී ත්‍රස්තවාදයට එරෙහිව සටන් කිරීමේ පළපුරුද්ද ඇති නිලධාරීන්ගේ දැනුම සහ අවබෝධය ඉතාම ප්‍රයෝජනවත් වෙයි. විපක්ෂ නායකවරයා ප්‍රකාශ කර තිබුණේ මෙම නිලධාරීන් විසින් සකස් කෙරෙන යෝජනාවලිය ජනාධිපති මෛත්‍රීපාල සිරිසේන මහතාටත් අග්‍රාමාත්‍ය රනිල් වික්‍රමසිංහ මහතාටත් ලබාදීමට කටයුතු කරන බවය. සිදුවිය යුත්තේද එය බව සඳහන් කිරීමට අපි නොපැකිළෙමු. පටු දේශපාලන වාද භේද පසෙක දමා සියලුදෙනා එක්වී තමන්ගේ දායකත්වය ලබාදිය යුතු මොහොතේ එය ලබාදීම ලොකුම යුතුකමය. හිටපු දක්ෂ නිලධාරීන් ලවා සකස් කරවා ගන්නා වාර්තාවක් දේශපාලන වාසියකට යොදා නොගෙන රටේ පාලක පක්ෂයට ලබාදීමට විපක්ෂනායකවරයා කටයුතු කරන ආකාරය අප අගයන්නේ එබැවිනි.

 

අග්‍රාමාත්‍ය රනිල් වික්‍රමසිංහ මහතාද සිය ප්‍රකාශයෙන් පැහැදිලි කර තිබුණේ මේ වනවිට ජනජීවිතය සාමාන්‍ය තත්ත්වයට ගෙන ඒමට පසුබිම නිර්මාණයවී තිබෙන බවත් ත්‍රස්තවාදී සැකකරුවන් විශාල පිරිසක් මේ වනවිට ද අල්ලාගෙන නීතිය හමුවට ඉදිරිපත් කිරීමට කටයුතු කර ඇති බවත්ය. මෙය රටේ ආරක්ෂාව සම්බන්ධයෙන් සංවේදී සියලු ජනතාවට සතුට දැනෙන ප්‍රකාශයක් බව නිසැකය. සිය ගණනකගේ ජීවිත අහිමි කළ සහ බරපතළ තුවාල කරුවන් බවට පත් කළ රුදුරු ත්‍රස්ත ප්‍රහාරයකින් දින 08ක් ගතවෙද්දී මේ තරමට හෝ ආරක්ෂාව තහවුරු කිරීමට හැකිවීම යහපත් ඉදිරි පියවරක් සේ අපි දකිමු. අවශ්‍ය වන්නේ මේ ආරක්ෂිත තත්ත්වය දිගටම පවත්වාගෙන යාමට කටයුතු කිරීමත් අතරමගදී එය අඩාළ වීමට කිසිදු ඉඩක් නොතැබීමත්ය. තීන්දු තීරණ ඉක්මනින් ගැනීමටත් සුදුසු නිලධාරීන්ට වගකීම් සහ බලතල පැවැරීමත් අත්‍යවශ්‍ය කොන්දේසියකි. වගකීම් සහ බලතල නැත්නම් නිලධාරීන්ට ක්‍රියාත්මක වීමට අවශ්‍ය පසුබිම නිර්මාණය වන්නේ නැත.

 

මේ සමඟ පැවැසිය යුත්තේ මේ රට තුළ කිසිදු ආකාරයක ත්‍රස්ත ක්‍රියාවක් මින් මතු සිදු නොවන තැනට වගබලා ගැනීම පවතින රජයේ වගකීම බවය. දරුණු ප්‍රහාරයක් සිදුවීමෙන් පසුව එය වළක්වා ගත නොහැකි වූයේ පවතින නීතියේ පවතින අඩුපාඩුකම් වැනි හේතු දැක්වීමෙන් පළක් වන්නේ නැත. පාර්ලිමේන්තුව ක්‍රියාත්මක වන්නේ නීති සම්පාදනයට මිස කෑකෝ ගසමින් එකිනෙකාට පරිභව කර ගැනීම සඳහා නොවේ. එසේම රජයට අවශ්‍ය ඇතැම් අණපනත් ඇසිපිය ගහන වේගයෙන් සම්මත කරගත් ආකාරය අපි ඕනෑතරම් දැක ඇත්තෙමු. තමන්ගේ පාලනය ගෙනයාමට වාසියක් වෙන එවැනි නීති සැකසීම පමණක් ප්‍රමාණවත් නොවන බව පාස්කු ඉරිදා බෝම්බ ප්‍රහාරය මගින් පෙන්වා දී තිබේ. නීති සැකසිය යුත්තේ දේශපාලන අවශ්‍යතා පිරිමසා ගැනීම සඳහා නොව රටේ ආරක්ෂාව සහ දියුණුවද සැලකිල්ලට ගනිමින් බව යළි යළි පෙන්වා දීමට සිදුවීම කනගාටුවක් බවද සඳහන් කළ යුතුය.

 

අගරදගුරුතුමන් සිය මාධ්‍ය සාකච්ඡාවේදී පෙන්වා දී තිබුණේ මින් ඉදිරියට මෙවැනි ව්‍යසනයක් සිදුකිරීමට කිසිවකුටත් ඉඩ නොලැබිය යුතු බවත් ත්‍රස්තවාදයට එරෙහිව මීට වඩා ශක්තිමත් වැඩපිළිවෙළක් තිබීම අවශ්‍ය බවත්ය. සිද්ධිය සම්බන්ධයෙන් පුළුල් විමර්ශනයක අවශ්‍යතාවද අගරදගුරුතුමන් විසින් පෙන්වාදී තිබිණි. මේ කරුණු සම්බන්ධයෙන් රජයේ ප්‍රබල අවධානය යොමුවීම අවශ්‍ය බව අපගේද අදහසය. එහිදී ජනාධිපතිවරයාට අග්‍රාමාත්‍යවරයාට පමණක් නොව විපක්ෂ නායකවරයාට ද මේ වගකීම් පැවරෙන බව අපි තරයේ විශ්වාස කරමු.