2025 අප්‍රේල් මස 22 වන අඟහරුවාදා
විමුක්ති එස් රුද්‍රිගු
|
ජාත්‍යන්තර මූල්‍ය අරමුදලේ ශ්‍රී ලංකා ජ්‍යෙෂ්ඨ දූත මණ්ඩල ප්‍රධානී පීටර් බෲවර් |
ශ්‍රී ලංකාව බදු නිදහස් කිරීම් ලබාදීමෙන් වැළකෙමින් මෙම මස අවසානයේදී සම්මත කරගන්නා අයවැය ජාත්‍යන්තර මූල්‍ය අරමුදලේ පරාමිතීන්ට අනුකූලව සිදුකිරීම සඳහා අවධානය යොමුකළ යුතු බවත් මෙරට සම්බන්ධයෙන් සිදුකරන සිව්වැනි සමාලෝචනය සඳහා එය ඉතා වැදගත් කරුණක් වනු ඇති බවත් ජාත්‍යන්තර මූල්‍ය අරමුදලේ ශ්‍රී ලංකා ජ්‍යෙෂ්ඨ දූත මණ්ඩල ප්‍රධානී පීටර් බෲවර් මහතා ඊයේ(04) පැවැති මාධ්‍ය හමුවේදී ප්‍රකාශ කළේය.
ඒ පිළිබඳව ජාත්‍යන්තර මූල්‍ය අරමුදල විශේෂ අවධානයක් යොමුකරනු ඇතැයිද ඒ මහතා පැවැසුවේය. ජාත්‍යන්තර මූල්‍ය අරමුදල ශ්‍රී ලංකාවේ අයවැය සමාලෝචනය කළ බවත් ඒ පිළිබඳ බලධාරීන් සමග සාකච්ඡා කළ බවත් ඔහු ප්‍රකාශ කළේය.
ශ්‍රී ලංකාවේ බදු ආදායම දළ දේශීය නිෂ්පාදිතයෙන් සියයට 7 ක ලෙස වාර්තා වී තිබූ බවත් එය මැදි ආදායම් සහ දුප්පත් රටවල් අතර රටක් ලැබූ පහළම බදු ආදායම බවත් පීටර් බෲවර් මහතා ප්‍රකාශ කළේය. පසුගිය වසරේදී ශ්‍රී ලංකාවේ බදු ආදායම දළ දේශීය නිෂ්පාදිතයෙන් සියයට 12.4 ක් දක්වා වැඩිකරගෙන තිබෙන බවත් එය කැපී පෙනෙන ලක්ෂණයක් බවත් ඔහු පැවැසුවේය.
ශ්‍රී ලංකාව ආර්ථික අර්බුදයෙන් ගොඩ ගැනීම සඳහා 2023 සහ 2024 වසරවලදී ඉදිරිපත් කළ අයවැයෙන් ඉතා අපහසු විශාල වැඩ කොටසක් සිදුකළ බවත් ඉතිරි අසීරු වැඩ කොටස මෙම අයවැයෙන් ඉටුවන බවත් ඔහු පැවැසුවේය. මෙවර අයවැයෙන් ශ්‍රී ලංකාවට දැන් ඉතිරිව ඇත්තේ රජයේ ආදායම දළ දේශීය නිෂ්පාදිතයෙන් සියයට 1.5කින් වැඩි කර ගැනීම බවද ඔහු ප්‍රකාශ කළේය.
ඉදිරි අයවැය මෙතරම් අසීරු නොවනු ඇති බවත් මෙය අවසාන තල්ලු‍ව බවත් ජාත්‍යන්තර මූල්‍ය අරමුදලේ ශ්‍රී ලංකා ජ්‍යෙෂ්ඨ දූත මණ්ඩල ප්‍රධානී පීටර් බෲවර් මහතා පැවැසුවේය. කෙසේ වෙතත් තවමත් මෙරට ආර්ථිකය අවදානම් සහගත තත්වයක පවතින බවත් ශ්‍රී ලංකාව ආර්ථික ප්‍රකෘතිය කරා යන ගමනට වෘත්තීය සමිති ක්‍රියා මාර්ග හේතුවෙන් බලපෑමක් එල්ල විය හැකි බවත් ඔහු ප්‍රකාශ කළේය.
ආර්ථික ප්‍රකෘතිය කරා යන ගමනේ මෙය අවසාන තල්ලු බැවින් සියලු දෙනාම කැපවීමක් කළ යුතු බවද ඔහු පැවැසුවේය. මීළඟ වසර මෙරට ජනතාවට වේදනාකාරී එකක් නොවනු ඇති නමුත් ආර්ථික ප්‍රතිසංස්කරණ ක්‍රියාත්මක කිරීම අඛණ්ඩව ඉදිරියට ගෙන යාමට ශ්‍රී ලංකාව කැපවී සිටිය යුතු බව ඔහු ප්‍රකාශ කළේය.
මෙම වසරේ ආදායම් ඉලක්ක සපුරා ගැනීම සඳහා පසුගිය රජය විසින් කුලී ආදායම් බද්ද හඳුන්වා දෙනු ලැබූ බවත් මෙම රජය ඔවුන්ගේ න්‍යාය පත්‍රය යටතේ ඊට සමාන විකල්පයක් හඳුන්වා දුන් බවත් බෲවර් මහතා පැවැසුවේය. ඉන් ආදායම් ඉලක්ක සපුරාගත හැකි බවට දෙපාර්ශ්වයම එකඟතාවකට පැමිණි බවත් ඒ අනුව කුලී ආදායම් බද්ද රජය හකුළා ගනු ලැබූ බවත් බෲවර් මහතා ප්‍රකාශ කළේය. කෙසේ වෙතත් විකල්පයෙන් ආදායම් ඉලක්ක සපුරා ගැනීමට නොහැකි වුවහොත් ඒ සඳහා නව බද්දක් හඳුන්වා දීමට රජයට සිදුවනු ඇතැයි ඔහු පැවැසුවේය.
දේපල බද්ද පිළිබඳව අදහස් දක්වමින් 'බෲවර් මහතා ප්‍රකාශ කර සිටියේ විශාල දේපලක් තිබෙන්නේ සමාජයේ ඉහළ ධනවතුන්ට බවත් ඔවුන් වැඩි වශයෙන් සමාජය ගොඩ නැගීමට දායකවිය යුතු බවත්ය.
ජාත්‍යන්තර මූල්‍ය අරමුදල මෙරටට ලබාදී ඇති ණය අරමුදල් වැඩසටන ක්‍රියාත්මක කිරීමෙහිලා ශ්‍රී ලංකාවේ ලබා තිබෙන ප්‍රගතිය මැන බැලීම සඳහා සිදුකළ තෙවැනි සමාලෝචනයට එම අරමුදලේ විධායක කමිටු පසුගියදා අනුමැතිය ලබා දුන්නේය.
අනුමැතිය හිමිවීමත් සමග මෙරටට ලබාදී ඇති මාස 48 ක විස්තීර්ණ ණය අරමුදල් පහසුකමේ සිව්වැනි වාරිකය ලෙස ලබාදීමට නියමිතව තිබූ ඇමෙරිකානු ඩොලර් මිලියන 334 ක මුදල වහාම නිදහස් කිරීමට ජාත්‍යන්තර මූල්‍ය අරමුදලේ විධායක කමිටුව අවසර ලබාදුන්නේය. ඒ සමග මෙතෙක් ශ්‍රී ලංකාවට ජාත්‍යන්තර මූල්‍ය අරමුදලෙන් ලැබුණු ණය මුදල් ප්‍රමාණය ඇමෙරිකානු ඩොලර් බිලියන 1.34 දක්වා ඉහළ ගියේය.
එහිදී ජාත්‍යන්තර මූල්‍ය අරමුදල ප්‍රකාශ කර සිටියේ ණය අරමුදල් වැඩසටහන ක්‍රියාත්මක කිරීමෙහිලා ශ්‍රී ලංකාව ලබාගෙන තිබෙන ප්‍රගතිය ඉතාමත් ශක්තිමත් බවත් සමාජීය වියදම් ඉලක්කය හැර පසුගිය වසරේ දෙසැම්බර් මාසය අවසන් වනවිට සපුරාලිය යුතු දර්ශක ඉලක්ක සියල්ල ශ්‍රී ලංකා සපුරා ඇති බවත් ජාත්‍යන්තර මූල්‍ය අරමුදල ප්‍රකාශ කළේය.
එසේම පසුගිය ජනවාරි මස අවසන් වනවිට සපුරාලිය යුතු ව්‍යුහාත්මක කඩඉම් සියල්ල ශ්‍රී ලංකාව සපුරා හෝ ප්‍රමාදයක් සහිතව ක්‍රියාත්මක කර තිබෙන බවද ජාත්‍යන්තර මූල්‍ය අරමුදල පැවැසුවේය. ශ්‍රී ලංකාව මෑතකදී සාර්ථකව අවසන් කළ බැඳුම්කර හුවමාරුව ණය තිරසරභාවය නැවත ඇති කිරිමේ දිශාවට තැබූ ප්‍රධාන සන්ධිස්ථානයක් බවද එම අරමුදල ප්‍රකාශ කළේය.
අයවැය පිළිබඳ IMF විමසිල්ලෙන්
Latha Thursday, 06 March 2025 09:14 AM
ඔයා මොනවා කළත් වැඩක් නෑ රජයේ වියදම් අඩු කරගන්න නැතිව රටේ ජනග්‍රහණයට සාපේක්ෂව රජයේ සේවක සංඛ්‍යාව අනිකුත් රටවල් සමඟ සංසදනය කරලා බලන්න වැරැද්ද එතැන