ක්ලෝගාඩ්, වනජීවී සංරක්ෂණ දෙපාර්තමේන්තුව සමඟ එක්ව ශ්‍රී පාද අඩවිය අවට පරිසර පද්ධතිය ආරක්ෂා කිරීමේ සත්කාරයකට දායක වෙන ලදී. මෙහි දී වටිනා ජෛව විවිධත්වයකින් යුත් ශ්‍රී පාද අඩවිය අවට ප්ලාස්ටික් දූෂණය අවම කිරීම උදෙසා විවිධ ආකාරයේ මුල පිරීම් රාශියක් සිදු කළේය.

‘ජල මුල රකිමු සමනොළ ගිර’ යන නාමය යටතේ සිදු කරන ලද මෙම කර්තව්‍ය ශ්‍රී ලාංකීය සංස්කෘතිය පිළිබඳව දැනුවත්භාවයක් ඇති කිරීම සහ මහජනතාවට නිසි ආකාරයෙන් ප්ලාස්ටික් අපද්‍රව්‍ය බැහැර කිරීම පිළිබඳව දැනුමක් ලබා දෙයි. අප්‍රේල් සිට මැයි දක්වා පවත්වන ලද මෙම ව්‍යාපෘතියේ මූලික අරමුණ වුයේ ශ්‍රී පාද අඩවියට පැමිණෙන බැතිමතුන් නිවැරදි ප්ලාස්ටික් බැහැර කිරීමේ ආකාරය පිළිබඳව දැනුවත් කිරීම වූ අතර, ඒ සඳහා ක්ලෝගාඩ් කණ්ඩායම සිය දායකත්වය දැක් වූ අතර, ශ්‍රී පාද මාර්ගයේ දැනුවත් කිරීමේ පුවරු සවිකිරීම සහ ස්වෙච්ඡාවෙන් ශ්‍රී පාද අඩවිය අවට ඇති ප්ලාස්ටික් අපද්‍රව්‍ය බැහැර කිරීම මගින් ඔවුන් මේ සඳහා සම්බන්ධ විය. තවද, ක්ලෝගාඩ් විසින් ප්ලාස්ටික් පරිහරණය අවම කිරීමේ අරමුණින් බැතිමතුන්ට මැටි බෝතල් ලබාදීම සිදු කරන ලද අතර, ඉදිකටුපාන, සීත ගඟු‍ල සහ රතු අම්බලම යන ස්ථානවල පිරිසුදු පානීය ජල පහසුකම් ඇති කිරීම මගින් ද ඔවුන්ගේ දායකත්වය දක්වන ලදී.

මෙම ව්‍යාපෘතිය පිළිබඳව අදහස් දක්වමින් හේමාස් හි අලෙවි හා වෙළඳනාම අංශයේ අලෙවිකරණ සාමාන්‍යාධිකාරී ඩෙරික් ඇන්තනි මහතා මෙසේ පැවසීය. මෙම ක්‍රියාන්විතයට දායක වී මෙම පූජනීය භුමියෙහි ආරක්ෂාව උදෙසා යම් කර්තව්‍යක් කිරීමට ලැබීම පිළිබඳව ආඩම්බර වනවා. දිවයිනේ සියලු‍ම ප්‍රදේශවල පාහේ පවතින මෙම ප්ලාස්ටික් දූෂණය අවම කිරීමට දැනුවත් කිරීමේ වැඩසටහන් තුළින් විශාල කාර්යභාරයක් ඉටු කරනු ලබනවා. එසේම ප්ලාස්ටික් දූෂණය අවම කිරීමට ක්‍රියා කිරීම සියලු‍ දෙනාගේම වගකීමක්.