2025 පෙබරවාරි මස 05 වන බදාදා
ක්‍රියාකාරී කමිටුවක් පත්කිරීමට දෙරටේ එකඟතාවක්
සාකච්ඡා අතරමග නතර වුණේ 2018 දී
දෙරටේ ව්‍යවසාය අතර සහයෝගීතාව දියුණු කිරීමටත් සූදානම්
අනිල් කරුණාරත්න
මෙතෙක් ප්‍රමාදව තිබූ නිදහස් වෙෙළඳ ගිවිසුම පිළිබඳ සාකච්ඡා නැවත ආරම්භ කිරීම සඳහා ශ්‍රී ලංකාව සහ චීනය ක්‍රියාකාරී කණ්ඩායමක් පිහිටුවීමට එකඟ වූ බව විදේශ අමාත්‍ය විජිත හේරත් ඊයේ තහවුරු කළේය.
ජනාධිපති අනුර කුමාර දිසානායකගේ මෑත කාලීන චීන රාජ්‍ය සංචාරයේ ප්‍රතිඵල දැනුම් දීම සඳහා පැවති මාධ්‍ය හමුවකදී අදහස් දැක්වූ අමාත්‍යවරයා, ද්විපාර්ශ්වික වෙළෙඳ ගිවිසුම ඉදිරියට ගෙන යාම සඳහා වන නැවුම් කැපවීම අවධාරණය කළේය.
“නිදහස් වෙෙළඳ ගිවිසුම පිළිබඳ සාකච්ඡා කිරීම සඳහා ක්‍රියාකාරී කණ්ඩායමක් පිහිටුවීමට දෙරට අතර එකඟතාවක් ඇති කරගත්තා” යැයි මාධ්‍යවේදීන් ඇසූ ප්‍රශ්නයකට පිළිතුරු දෙමින් ඔහු පැවසීය.
සාකච්ඡා වට හයකින් අනතුරුව ශ්‍රී ලංකා - චීන නිදහස් වෙෙළඳ ගිවිසුම අතරමඟ ඇණහිටියේ 2018 වසරේදීය. 2018 වසරෙන් පසු පළමුවරට රටවල් දෙකම අතර සාකච්ඡා ආරම්භ කරනු ලැබුවේ පසුගිය වසරේදීය. චීනය 2018 දී ගත් පෙර ස්ථාවරයට වඩා යම් නම්‍යශීලී බවක් පෙන්නුම් කර ඇති බව ප්‍රධාන සාකච්ඡාකරු කේ.ජේ. වීරසිංහ මාධ්‍ය හමුවකදී පැවැසීය.
ජනාධිපති දිසානායකගේ සාර්ථක චීන සංචාරයෙන් පසු නිකුත් කරන ලද ඒකාබද්ධ ප්‍රකාශයේ සඳහන් වූයේ ආර්ථිකයේ සහ වෙෙළඳාමේ ද්විපාර්ශ්වික සහයෝගීතාවේ ප්‍රගතිය පිළිබඳව දෙපාර්ශ්වයම සෑහීමකට පත්වන බවයි.
විවිධ ක්‍රම මගින් ශ්‍රී ලංකාවේ ආනයන ප්‍රවර්ධනය කිරීමට චීනය දරන උත්සාහය පිළිබඳව ශ්‍රී ලංකාව කෘතඥතාව පළ කළේය. චීන ආනයනකරුවන්ගේ සහ අපනයනකරුවන්ගේ අදාළ සංගම් සමඟ සබඳතා ඇති කර ගැනීමේදී තේ, මැණික් සහ අනෙකුත් කර්මාන්තවලදී ශ්‍රී ලාංකික ව්‍යවසායන්ට අඛණ්ඩව සහාය වීමට, චීන ජාත්‍යන්තර ආනයන ප්‍රදර්ශනය, චීන ආනයන හා අපනයන ප්‍රදර්ශනය, චීන - දකුණු ආසියානු ප්‍රදර්ශනය සහ ඊ-වාණිජ්‍ය වේදිකා වැනි ප්‍රදර්ශන සඳහා ශ්‍රී ලංකාවේ සහභාගීත්වයට පහසුකම් සැලසීමට සහ අන්‍යෝන්‍ය ප්‍රතිලාභ සහ ජයග්‍රාහී ප්‍රතිඵල මත පදනම්ව දෙරටේ ව්‍යවසාය අතර සහයෝගීතාව තවදුරටත් වැඩි දියුණු කිරීමට සූදානමින් සිටින බවද චීනය අවධාරණය කළේය.
“සමානාත්මතාව, අන්‍යෝන්‍ය ප්‍රතිලාභ සහ ජයග්‍රාහී ප්‍රතිඵල යන මූලධර්මවලට අනුකූලව, එක් පැකේජයක් තුළ පුළුල් නිදහස් වෙෙළඳ ගිවිසුමක් ඉක්මනින් අවසන් කිරීම සඳහා කටයුතු කිරීමට දෙපාර්ශ්වය එකඟ වූහ” යනුවෙන් එම ප්‍රකාශයේ සඳහන් වේ.
ශ්‍රී ලංකාව චීනයෙන් වැඩි වැඩියෙන් ලැබෙන ව්‍යාපාරික ආයෝජන පිළිගන්නා බවත්, ඒ සඳහා හිතකර ආයෝජන සහ ව්‍යාපාරික පරිසරයක් සපයන බවත් එහි වැඩිදුරටත් සඳහන් වේ. ශ්‍රී ලංකාවේ ආර්ථික පරිවර්තනය සහ තිරසාර සංවර්ධනය සඳහා පහසුකම් සැලසීමට චීනය ශ්‍රී ලංකාවේ ආයෝජනය කිරීම සඳහා චීන ව්‍යවසාය දිරිමත් කිරීම දිගටම කරගෙන යනු ඇත. ඔවුන්ගේ උසස් තත්වයේ සහ අන්‍යෝන්‍ය වශයෙන් ප්‍රයෝජනවත් ප්‍රායෝගික සහයෝගීතාව ඉදිරියට ගෙන යාම සඳහා අවශ්‍ය කරන සැපයුම්, හරිත සංවර්ධනය සහ ඩිජිටල් ආර්ථිකය වැනි ක්ෂේත්‍රවල සහයෝගීතාව පුළුල් කිරීමට දෙපාර්ශ්වය එකඟ විය.
ශ්‍රී ලංකා - චීන නිදහස් වෙෙළඳ ගිවිසුම: නැවත සාකච්ඡා