පෙබරවාරි තේ නිෂ්පාදනය කිලෝ මිලියන 15.59ක් දක්වා මිලියන 4.40කින් පහළට 

ජනවාරි - පෙබරවාරි සමස්ත තේ නිෂ්පාදනය කිලෝ මිලියන 37.16ක් දක්වා මිලියන 1.37කින් පහළට 

භානුක අමරසිංහ 

පෙබරවාරි මාසයේදී මෙරට සමස්ත තේ නිෂ්පාදනය තේ කිලෝග්‍රෑම් මිලියන 15.59ක් ලෙස සටහන්ව තිබේ. මෙය 2024 පෙබරවාරි මාසයේදී වාර්තා වූ කිලෝග්‍රෑම් මිලියන 19.99ක තේ නිෂ්පාදනය හා සැසඳී‍මේදී කිලෝග්‍රෑම් මිලියන 4.40ක අඩුවීමකි. මෙම දත්ත සම්බන්ධයෙන් විශ්ලේෂණයක් ඉදිරිපත් කරන ෆෝබ්ස් ඇන්ඩ් වෝල්කර් රිසර්ච් ආයතනය, 2023 පෙබරවාරි මාසයේදී වාර්තා වූ කිලෝග්‍රෑම් මිලියන 18.76ක තේ නිෂ්පාදනය හා 2025 පෙබරවාරි මාසයේ තේ නිෂ්පාදනය හා සැසඳීමේදී තේ කිලොග්‍රෑම් මිලියන 3.16 ක අඩුවීමක් සඳහන්ව තිබේ. 

මේ අතර 2025 වසරේ ජනවාරි - පෙබරවාරි කාලසීමාවේදී සමස්ත තේ නිෂ්පාදනය කිලෝග්‍රෑම් මිලියන 37.16ක් වාර්තා කර තිබේ. එය 2024 වසරේ එම කාලසීමාවේදී වාර්තා වූ සමස්ත තේ කිලෝග්‍රෑම් මිලියන 38.53 හා සැසඳීමේදී තේ කිලෝග්‍රෑම් මිලියන 1.37ක අඩුවීමකි. 

එහිදී උස් බිම් තේ නිෂ්පාදනයේ ඉහළ යාමක් පෙන්නුම් කර ඇති අතර, මැදි බිම් සහ පහත් බිම් තේ නිෂ්පාදනය පහත වැටීමක් පෙන්නුම් කර තිබේ. මේ අතර ෆෝබ්ස් ඇන්ඩ් වෝල්කර් රිසර්ච් ආයතනය වසරේ මුල් මාස දෙකේදී වාර්තා කළ මෙම තේ නිෂ්පාදනය 2023 වසරේ එම කාලසීමාවේ වාර්තා කළ තේ කිලෝග්‍රෑම් මිලියන 37.23 හා සසඳමින්, එය කිලෝග්‍රෑම් මිලියන 0.07ක අඩුවීමක් ලෙස සඳහන් කරයි.