සූර්යා විම් සහ ශ්‍රී ලංකා තරුණ කවුන්සිලය එක්ව මෙරට දක්‍ෂතා දක්වන තරුණයන් ඇගැයීම උදෙසා සංවිධානය කෙරුණු තරුණ සම්මාන උළෙලක් කොළඹ ෂැන්ග්‍රිලා හෝටලයේ දී පසුගියදා පැවැත්විණි.

මෙම අවස්ථාවට ප්‍රධාන ආරාධිතයන් වශයෙන් ආරක්‍ෂක රාජ්‍ය අමාත්‍ය ප්‍රමිත බණ්ඩාර තෙන්න්කෝන් මහතා හා සූර්ය සන්නාම තානාපතිනී යශෝධා විමලධර්ම මහත්මිය සහභාගී වූහ.

මෙහිදී විවිධ ක්ෂේත්‍රවල ජයග්‍රහණ සහ නායකත්වය වෙනුවෙන් කැපවූ තරුණ තරුණියෝ 40 දෙනෙක් ඇගැයීමට ලක් වූහ.

මෙහිදී 2024 සූර්ය යොවුන් නායකයා ලෙස අධ්‍යාපනයෙන් සහ ක්‍රිකට් ක්‍රීඩාවෙන් දැක්වූ දක්‍ෂතා මත සජිත විතානගේ, සම්මාන දිනා ගත්තේය.

ඊට අමතරව කලාපීය ජයග්‍රාහකයන් ලෙස මධ්‍යම පළාතෙන් කනිෂ්ඨ මයිකල් ද නැගෙනහිර පළාතෙන් ජයන්ත් අමලනාදන්ද, උතුරු මැදින් මිණිනුවන් බණ්ඩාරද, වයඹින් ලිලාන් උදයංගද, සබරගමුවෙන් රචිකා අංජනද, දකුණෙන් භාග්‍යා ලියනගේද, ඌවෙන් චමෝදි ප්‍රබෝධා සහ බස්නාහිරින් රන්දිල් පෙරේරා යන අය සම්මාන දිනා ගත්හ.

සන්මැච් සමාගමේ අධ්‍යක්‍ෂිකා ගෞරි රාජන් මහත්මිය මෙහිදී අදහස් දක්වමින් සඳහන් කළේ ඉදිරි පරම්පරාවේ නායකයන් සහ නවෝත්පාදකයන් පෝෂණය කිරීම සහයෝගය ලබාදීමට හැකිවීම ගැන සතුටට පත්වන බවයි.
එසේම මෙම සම්මාන උළෙලේ ආරම්භයේ සිටම රැඳී සිටීමට හැකිවීම ගැන ආඩම්බරවන බවද ඇය සඳහන් කළාය.

අමිල චින්තක ගමගේ