(තිළිණි ද සිල්වා)
 
සංචාරක ආකර්ෂණයෙන් යුතු නව සංචාරක ස්ථාන 6059 ක් දිවයින පුරා ප්‍රදේශ රැසකින් හදුනාගෙන ඇතැයි සංචාරක අමාත්‍ය ප්‍රසන්න රණතුංග මහතා පැවසීය.
 
එම සංචාරක ස්ථාන දෙස් විදෙස් සංචාරකයන් අතර ප්‍රචලිත කිරීමට විශේෂ වැඩසටහනක් ඉදිරියේදී ක්‍රියාත්මක කිරීමට නියමිත බවද  සංචාරක අමාත්‍යවරයා කීය.
 
මෙම නව සංචාරක ස්ථාන පරිසර හිතකාමී ස්ථාන බවත් වනජීවි, වනසංරක්ෂණ, පුරාවිද්‍යා වැනි ආයතන සමග සම්බන්ධීකරණය කර ඒවා දියුණු කිරීමට අපේක්ෂා කරන බවත් පැවසූ අමාත්‍යවරයා වැඩිදුරටත් කියා සිටියේ මෙරටට පැමිණෙන සංචාරකයන් වැඩි කාලයක් රට තුළ රදවා ගැනීමේ අරමුණෙන් මෙම නව සංචාරක ස්ථාන හදුන්වා දෙන බවය.
 
නුවරඑළිය දිස්ත්‍රික්කයේ පමණක් නව ආකර්ෂණීය සංචාරක ස්ථාන 318 ක් හදුනාගෙන ඇති අතර, නුවරඑළිය කේන්ද්‍ර කරගනිමින් සංචාරක කළාපයක් ප්‍රකාශයට පත් කිරීමට ඉදිරියේ දී කටයුතු කරන බවද සංචාරක අමාත්‍යවරයා පෙන්වා දුන්නේය.
 
මීට අමතරව සංචාරක ආකර්ශනය ඉහළ නංවා ගැනීම සදහා නානුඔය සිට නුවරඑළිය දක්වා කේබල් රථ ව්‍යාපෘතියක් ක්‍රියාත්මක කෙරෙන බවත්, යුරෝ මිලියන 52 ක මුදලක් වැය කරමින් සිදු කරන මෙම ව්‍යාපෘතියේ අදාළ ඉදිරි කටයුතු ද සිදු කෙරෙමින් පවතින බව ඇමතිවරයා  වැඩිදුරටත් කියා සිටියේය.