ශ්‍රී ලංකා මහ බැංකුව ග්‍රීසියේ බැඳුම්කර මිලදී ගැනීමේ ගනුදෙණුව නීති විරෝධී ආයෝජනයක් බවත් එමගින් මහජන මුදල් රුපියල් කෝටි 300ක පාඩුවක් සිදුව ඇති බවත්, ඒ පිළිබඳ පරීක්ෂණයක් පැවැත්විය යුතු බවත් ඉල්ලමින් එක්සත් ජාතික පක්ෂ පාර්ලිමේන්තු මන්ත්‍රී සුජීව සේරසිංහ මහතා අද අල්ලස් හෝ දූෂණ විමර්ශන කොමිෂන් සභාවට පැමිණිල්ලක් ඉදිරිපත් කළෝය. ජාතික ඉතිරිකිරිමේ බැංකුවේ හිටපු සභාපති ප්‍රදීප් කාරියවසම්ට එරෙහිව ඉදිරිපත් කෙරුණු පැමිණිල්ල සම්බන්ධයෙන් වහා ක්‍රියාත්මක වීම නිසාත්, හිටපු ශ්‍රේෂ්ඨාධිකරණ විනිසුරු බාලපටබැඳි මහතා මෙම අල්ලස් කොමිසමේ සභාපති ධුරය දරණ නිසාත් රටට සාධාරණයක් වීම අපේක්ෂාවෙන් තමන් මෙසේ පැමිණිලි කරන බවත් ඉදිරියේදී ප්‍රෝලියම්, මිහින් ලංකා, එයාර් ලංකා ඇතුළු විවිධ රාජ්‍ය ආයතන සම්බන්ධයෙන් මෙම කොමිසම හමුවේ පැමිණිලි කිරීමට බලාපොරොත්තු වන බවත් සේරසිංහ මහතා පැවැසීය. පාර්ලිමේන්තු මන්ත්‍රීවරියන් වන තලතා අතුකෝරාල, රෝසි සේනානායක හා පළාත් සභා මන්ත්‍රී නිරෝෂන් පාදුක්ක යන මහත්ම මහත්මීන්ද මීට එක්වූහ.