ලොව අති දුර්ලභ ශාකයක් වන කෝන්තාලං ශ්‍රී ලංකාවෙන් වඳවී යාමේ තර්ජනයට ලක්ව ඇතැයි පරිසරවේදීහු පෙන්වාදෙති. ශ්‍රී ලංකාවේ දැනට වාර්තාවන එම වර්ගයේ අවසන් ශාක හතර ගාල්ල රූමස්සල කන්දේ නැගෙනහිර බෑවුමේ පිහිටි උණවටුන වැල්ල දේවාල භූමියේ පිහිටා තිබේ.

උද්භිද විද්‍යාත්මකව සියලොකාපස් රම්පි Xylocarpus rumphii ලෙස හඳුන්වන කෝන්තාලං ශ්‍රී ලංකාව, මැඩගස්කර් දූපත් හා මැලේසියාවේ වෙරළබඩ ප්‍රදේශවලින් වාර්තා වී ඇත. සිංහල වෙදකමේ සුප්‍රසිද්ධ ‘‘ගොපළු ගුලිය“ නමැති ඖෂධය මෙම ශාකයේ කොටස් යොදාගෙන සාදයි.

මීටර අටක් හෝ දහයක් පමණ උස්ව වැඩෙන කෝන්තාලං ගසේ මාර්තු අප්‍රේල් මාස වලදී සුදු පැහැති කුඩා මලක් හටගෙන බෙලි ගෙඩියක් වැනි ඵලයක් ඇතිවේ. එහි බීජ හතරකි. බීජ පැලකිරීමේ හැකියාව ඇතැයි පැවසුව ද ඒවායින් පැල හටගන්නා බව පෙනෙන්නට නැත.

උණවටුනේ ඇති කෝන්තාලං ශාක හතර ඉතා වයස්ගත තත්ත්වයට පත්වී ඇති අතර එහි කඳෙහි ඇති ගස් බෙන ඇතුලට දේවාලයට පැමිණෙන බැතිමතුන් විසින් අපද්‍රව්‍ය දැමීම හේතුවෙන් මේ දුර්ලභ ශාකයේ විනාශය කඩිනම් වී තිබේ.