දොළොස් මසක් ගෙවී වසරක නිමාව සමග එළඹෙන නව වසර ගැන සිතීමට හෝ සැලසුම් කිරීමට මත්තෙන් අප ගෙවුණ වසර පිළිබඳ ආවර්ජනාත්මක විමසුමක් කිරීම වැදගත් වන්නේ තමන් අතින් සිදුවූ වැරදි අඩුපාඩු සකසා ගනිමින් හා ගෙවූ වසර තුළ ජීවිතය මුහුණදුන් යම් සිදුවීම් ඇසුරෙන් උගත හැකි පාඩම් ද ඇති බැවිනි. උදාවන නව වසර ඉතා යහපත්ව හා සුවද‌ායකව ගත කිරීමට සිත් තුළ අධිශ්ඨාන තබා ගනිමින් ඒ සඳහා කැපවීම අවශ්‍ය බව අමතක නොකරමු. මෙහිදී විශේෂයෙන් අප එකිනෙකා අදහන ආගම දහම කෙරෙහි යොමුවිය යුතුව ඇත. මන්ද කුමන පුද්ගලයෙක් හෝ සමාජයක් සුමගට හැරවීමේ ප්‍රධාන සාධකය වන්නේ තමන්ගේ ආගමයි. ආගමානුකූලව ජීවත් වෙන්නට හුරුපුරුදු වූ කල නිතැතින්ම යහපත් සමාජයක් බිහිවෙනු ඇත. ඒ වග අප ගෞතම බුදුපියාණන් වහන්සේ මනාව දේශනා කොට ඇත. තිසරණ පෙරටු කොට පංචශීලයෙහි පිහිටා ජීවත් වීම ද හා තවද මෙත්තා මුදිතා කරුණා උපේක්ඛා යන සතර බඹ විහරණයෙන් එය ඔප නංවා ගත් කළ ජීවිතවල වටිනාකම පිළිඹිබු වන්නේය.  

 

 අප ​ෙ​ෙමත්‍රියෙන් හදවත් පුරවා මනුෂ්‍යයන්ට මෙන්ම සතුන්ට ද සම සිතින් කරුණාව දැක්විය හැකි නම් ඔබ සමාජයට යහපත් කැපී පෙනෙන හා අගය කරන කෙනෙකු වනු ඇත. එමෙන්ම අන් අයගේ සිත් රිදවන සැරපරුෂ වෙනුවට ඔබ කතා කරන වචන මෘදු මොලොක් බවින් යුක්ත නම් ඔබ මුදිතා ගුණයෙහි පිහිටියා වැන්න. එවිට ඔබ ප්‍රියමනාප පුද්ගලයෙකි. එමෙන්ම උපේක්ඛා ගුණය නම් වූ ඉවසීම ඔබ ජීවිතය ජයගැනීමට ඉතාම අවැසි පුරුදු පුහුණු කළ යුතුම දෙයකි. පවුල තුළින් හා සමාජීය වශයෙන් විවිධ අවස්ථාවල සිදුවන හැල හැප්පීම් හමුවේ ඔබේ ඉවසීම ඉතාම වටිනු ඇත.  

 

 තව ද අප අනුන්ගේ රොස් පරොස් විවේචනය නොකර තම තමන්ගේ අඩුලුහුඬු සකසා ගෙන දැහැමිව හා සමාජයට වැඩද‌ායකව වෙසෙන්නට උත්සාහ ගන්නා විට අපගේ බාල පරම්පරාවට ද එය ආදර්ශයක් වන්නේය. ඒ මගින් අප අවට වෙසෙන්නන් හා ඇතිවන ගැටලු ද අවම වනු ඇත. වටපිටාවේ සාමය ඇති වී එය මුළු මහත් සමාජය සිසාරා විහිදී බියෙන් සැකෙන් තොරව ජීවත් වීමේ හැකියාව උද‌ාවනු ඇත.  

 

 ලබන්නා වූ 2019 නව වසර සියලු දෙනාටම තිසරණයේ ආනුභාවයෙන් යහපත් සිතුම් පැතුම් ඉටුවන වාසනාවන්ත සුභ නව වසරක් වේවායි ඉත සිතින් පතන්නෙමු.