අතුරුදන් වූ තැනැත්තන් වෙනුවෙන් නොදුටු සහතික නිකුත් කිරීම ළඟදීම ඇරඹිය හැකි වනු ඇතැයි ස්වදේශ කටයුතු අමාත්‍යංශය පවසයි.
එම සහතික ලබාදීමට අදාළ යෝජනාවට කැබිනට් අනුමැතිය ලැබී ඇති අතර එහි ගැසට් පත‍්‍රය මුද්‍රණය සඳහා භාර දී ඇති බැවින් අද හෙටම නිකුත් වනු ඇතැයි ස්වදේශ අමාත්‍ය වජිර අබේවර්ධන මහතා ශ්‍රී ලංකා සංවර්ධන පරිපාලන ආයතනයේ අද(26) පැවැති දිසා ලේකම් සමුළුවේදී පැවසීය.
මේ සඳහා ක‍්‍රියා කරන ව්‍යවස්ථාපිත අධීකාරියක් පිහිටුවීමට නියමිත අතර ව්‍යවස්ථාදායක සභාව මගින් ඒ සඳහා සභාපතිවරයෙක් පත් කිරීමට නියමිතව ඇතැයි ද කී අමාත්‍යවරයා අතුරුදන් වූවන් වෙනුවෙන් මෙම අධිකාරිය මගින් නීත්‍යනුකූල කටයුතු ඉටුකොට නොදුටු සහතික නිකුත් කරනු ඇතැයි සඳහන් කළේය.
මේ අතර අතුරුදන් පුද්ගලයින් පිළිබඳ කාර්යාලයක් පිහිටුවීමට රජය තීරණය කර ඇති බවත් පසුගිය සමයේ අතුරුදන්වඇති බවට හෝ සොයාගත නොහැකි බවට වාර්තාවන පුද්ගලයින් සම්බන්ධයෙන් වන තොරතුරු ඔවුන්ගේ ඥාතීන්ට ලබාදීම මෙම කාර්යාලය පිහිටුවීමේ අරමුණ බවත් ස්වදේශ කටයුතු අමාත්‍යංශය කියයි.
මේ අතර ‘නිල මෙහෙවර - සහන සේවය‘ තේමාව යටතේ ස්වදේශ කටයුතු අමාත්‍යංශයේ පූර්ණ මෙහෙයවීමෙන් දිවයිනේ සියලු දිස්ත්‍රික් ලේකම් කාර්යාල හා ප්‍රාදේශිය ලේකම් කාර්යාල වෙත ආපදා තත්ත්වයට පත් ජනතාව වෙත ලැබුණු ද්‍රව්‍යමය ආධාර ප්‍රදානය කිරීම ස්වදේශ කටයුතු ඇමැති හා ආපදා කළමනාකරණ ඇමැති අනුර ප්‍රියදර්ශන මහත්වරුන්ගේ ප්‍රධානත්වයෙන් කොළඹ නිදහස් චතුරශ්‍ර පරිශ්‍රයේදී අද පැවැත්විණි.
ඡායාරූප - රොමේෂ් ධනුෂ්ක සිල්වා
ඡායාරූප හා වීඩියෝ - ඉසංක සුනිමල්
